Украина президенті Владимир Зеленский Мәскеу ұсынған келісім сақталса, Киев те бітімге дайын екенін мәлімдеді, деп хабарлайды Todayinfo ақпарат агенттігі. Бұл туралы ол 19 сәуір күні өзінің Telegram-арнасында жазды.
Оның айтуынша, 30 күнге толық әрі сөзсіз атысты тоқтату туралы ұсынысқа Ресей тарапынан 39 күннен бері ешқандай жауап берілмеген. Бұл бастаманы АҚШ ұсынған, ал Украина оны оң қабылдаған. Алайда Зеленскийдің айтуынша, Ресей бұл ұсынысты елемеген.
Егер Ресей атысты толық әрі сөзсіз тоқтатуға шын ниетті болса, Украина да соған сәйкес әрекет ететінін жеткізді. «Тыным — тынымға жауап, соққы — тек қорғану қажет болғанда ғана», — деп түсіндірді Зеленский.
Сонымен қатар, Украина 20 сәуірдегі Пасха мерекесінен кейін де бітімді ұзартуды ұсынады. Зеленский бұл бастама Ресейдің шынайы ниетін айқындайтын сынақ болатынын айтып, 30 күн тыныштық бейбітшілікке мүмкіндік береді деді.
Осы уақытқа дейін Ресей шабуылдарын тоқтатпағанын, артиллериялық соққылар жалғасып жатқанын атап өтті. «Қазіргі таңда біз Мәскеуден айтылған сөздерге сенбейміз. Мәскеудің қалай манипуляция жасайтынын жақсы білеміз, сондықтан барлық жағдайға дайынбыз. Біздің күштер әрбір шабуылға орынды және лайықты жауап қайтарады», — деді Зеленский.
Сондай-ақ, ол кешке Бас қолбасшы Александр Сырскийден майдан шебіндегі жағдай туралы есеп күтетінін айтты.
Айта кетейік, бұған дейін, 19 сәуір күні Ресей президенті Владимир Путин Пасхаға байланысты бітім жариялап, ұрыстар 19 сәуір сағат 18:00-ден 21 сәуір сағат 00:00-ге дейін тоқтатылатынын хабарлаған болатын.
