Киев, Украина — Украина президенті Владимир Зеленский кешкі үндеуінде Ресей аумағына шабуыл жасауға рұқсат алғанын мәлімдеді. Бұл туралы Todayinfo хабарлады.
Владимир Зеленский. Фото: Spencer Platt/Getty Images
CNN телеарнасының мәліметі бойынша, АҚШ президенті Джо Байден Украинаға қашықтыққа ұшатын америкалық қаруларды Ресей аумағында пайдалануға рұқсат берген. Ақ үй бұл шешімді Мәскеудің Ресейдің оңтүстігіндегі Курск облысына 50 мыңға жуық әскер жіберуінен кейін қабылдаған.
Зеленскийдің мәлімдемесі:
«Украинаны күшейту жоспары – менің әріптестерге ұсынған Жеңіс жоспарым. Құжаттың басты тармағының бірі армиямыздың қашықтыққа жетуін қамтиды. Бүгін ақпарат құралдарының көбі біздің қарымта шабуылға рұқсат алғанымыз туралы жазып жатыр. Бірақ соққы сөзбен жасалмайды. Мұндай нәрселерді жариялаудың өзі артық. Зымырандар өзі-ақ жауап береді. Міндетті түрде», — деді Зеленский Telegram-арнасында.
«Жеңіс жоспары»
Зеленский қазан айында Жоғарғы Радада баяндама жасап, «жеңіс жоспарын» әзірлегенін, қыркүйек айының соңында АҚШ-қа барып қайтқанын айтқан. Жоспар әлі күнге дейін ресми түрде жарияланған жоқ. Құжат бес тармақтан және үш құпия қосымшадан тұрады. Солардың бірі Ресей аумағына соққы жасауға салынған тыйымды алып тастауды қарастырады.
ATACMS зымырандары
Құрама Штаттар соғыстың алғашқы екі жылында Украинаға ATACMS зымырандарын бермей келген, бірақ кейін Байден қашықтыққа ұшатын бұл зымыранды Украина аумағында ғана қолдануға рұқсат берген. Әскери тактикалық жүйе АҚШ-тан Украинаға биыл сәуірде жеткізілген.
