Әлеуметтік желідегі жазбада Қымбат Досжан тергеу барысындағы қиындықтар мен бала саудасы ісіне қатысты мәліметтермен бөлісті
Туған анасын іздеп жүрген Жәнібек Жұмағұловтың ресми өкілі Қымбат Досжан әлеуметтік желі арқылы қоғамға үндеу жасады. Ол бала саудасына қатысты кейбір деректерді ашып, Жәнібектің туған анасын іздеудегі қиындықтар туралы баяндады.
Коллаж: Aikyn.kz
«2025 жылдың алғашқы күні Жәнібек Жаңа жылмен құттықтап, Қазақстанға келгісі келгенін айтты. Бірақ мен оны қуантар жаңалығым болмағандықтан, бұл өтінішін орындай алмадым», – деп жазды Қымбат Досжан.
Ол 2024 жылдың желтоқсан айында ҚР Мемлекеттік кеңесшісі мен Бас прокурорға хат жолдағанын, онда бала асырап алу ісінде орын алған жемқорлық туралы нақты деректер көрсетілгенін мәлімдеді.
Бала асырап алу ісіндегі күдікті деректер
Жазбада Бельгия азаматшасы Валери Савельеваның Арқалықтағы балалар үйінен Жәнібекті асырап алу барысында 12 мың АҚШ долларын аудармашы әйелге бергені және сол әйелдің балаларды таңдау процесінде арнайы нұсқау бергені айтылған. Бұл ақпарат Валери Савельеваның өз аузынан видеосұхбатта расталған.
«Бұл оқиғада аудармашы басты фигурант емес. Бала саудасына қатысты барлық тұлғалар, оның ішінде ресми лауазымды қызмет атқарғандар да тергеуге тартылуы тиіс», – деді Қымбат Досжан.
Жәнібектің анасы неге табылмай жатыр?
Қымбат Досжан қазіргі тергеу жұмыстарының баяулығына назар аударды. Жәнібектің туған анасын іздестіру кезінде 54 әйелдің ДНҚ-сын тексерген, бірақ ешқайсысы сәйкес келмеген. Тергеу органдарының мәліметінше, қалған әйелдерді табу қиын, кейбірі шетелге көшіп кеткен.
«Полиция қызметкерлерінің жұмысы жетіспейді. Жәнібектің болжамды әкесінің туыстары да ДНҚ тестінен бас тартып отыр», – деп жазды Қымбат Досжан.
Жәнібектің қазіргі өмірі
Қазіргі уақытта Жәнібек Испанияда өмір сүріп, түрлі салада жұмыс істеп жүр. Ол туған анасын табуға бар күшін салып келеді.
«Жәнібек үшін ең басты сұрақ – «Менің анам кім?». Бұл сұрақ оның күнделікті өмірінде мазалауын тоқтатпайды», – деді Қымбат Досжан.
