Танымал саясаткер, қоғам қайраткері Иманғали Тасмағамбетов ауыр мәлімдеме жасады. Өмірін тек лауазымды қызметтерге арнаған шенеунік халқына, соның ішінде желі қолданушыларына деген ренішін жайып салды, деп хабарлайды Todayinfo ақпараттық порталы.
Ол Мәскеу төрінен соңғы жылдары бірнеше рет ресми мәлімдемелер жасаған еді. Оның бұл сөздері қоғамда қызу талқыланып, сынға ілікті. Алайда сынға қатысты Тасмағамбетов өзінің көзқарасын айтты.
Ол өзінің өмір жолы қалың қазаққа белгілі деп бастады. Өмірін жылы креслода өткізіп келе жатқан саясаткер, егемен мемлекет болғалы ел игілігіне үлес қосқанын еске салды
«Әрине, ауыр жол атыңды сынайды, қиын іс адамды сынайды деген. Осы жолда талай сый да, сын да болды. Оның ішінде қадіріңді бағалағандар да, жалған жала жауып босқа айыптағандар да болды. Дегенмен, сол жалған айыптарға көңіл бөлмедім. Сотқа жүгініп кеткен есебім ешкімде жоқ. Өйткені, атам қазақ айтпақшы, ақтың отын ақымақ өшіре алмайды, қашанда әр мәселенің әділдігін адам көрмесе де Алла көреді деген қағидаға сүйендім. Десек те, өтірігі шындай, шыны құдай ұрғандай болған мына әлеуметтік желіге сенген кейбір адамдардың үндемегенді басып, табанына тастауға дайын, жағадан алып жаныштауға құмар екендігіне көзім әбден жетті», — деді ренжіген Тасмағамбетов.
Ол өзінің атағын қорғап қалатынын айтып, анасынан тәрбие алғанын, туған жері мен еңбек жолын еске салды. Ол өзін қазір Ресейде туған елі үшін от пен суға түсіп жүргенін айтты.
«Азды-көпті абырой-атымды болымсыз ортаның саудасына салмай, барша ағайын-туысқа бір жауабымды берсем деп шештім деген ол Біріншіден, мен әрбір тасы қазақтың иісі аңқыған Атырауда туып, шүкіршілігін баба дәстүрімен шүкір еткен атамның тәрбиесін, көз ашқаннан санама қазақтың рухын, мәдениеті мен әдебиетін сіңірген анамның тәлімін алып өскен қазақпын. Шыңғыс Айтматов айтқандай, жеті атасын танымайтын адам – жетесіз, оны білмеуден әдепсіз қылық пен арам істен жеркенбеу басталады.
Қарапайым да қатал елдік философияны үлкендердің аузынан көп естіп, шыққан тегін, барар жерін, жақынын, жатты айыруды біліп өскендердің қатарынанмын. Ал енді бүгінгі туған жеріне салмағы жоқ, жел айдаған дәнсіз қауыз тәрізді кейбір бақытсыз жандар үшін мен Ресей үшін сатқын екенмін. Сонда қалай, келіссөздің күші емес, зымыранның ұшуы басым тұрған заманда халықаралық әскери ұйымға туған елімнің атынан барып, қауіпсіздігі үшін отқа, мүддесі үшін суға түскенім үшін бе?», — деді күйінген саясаткер.
Ол Ресейдегі қазіргі саяси жұмысының тым ауыр екенін де айта кеткен.
«Егер дәл солай болса, онда мен заманында «орысшылсың» деп айыпталған ұлы Абайдың сөзімен қайырайын:
«Адамнан надан артпас, қам жемеңіз,
Қараңғылық – тағдыр емес, болмайды теңіз», – дейді. Яғни, жүрегің азаптан жарылғалы тұрса да, қадіріңді білмегендердің алдында еңсеңді түсірме дегені. Сондықтан, түсінгендерді бағалап, түсінбегендерден сырт айналып өтетін өмір бұл.
Екіншіден, мен қолыма қару алып оқ атпасам да, жаугершілік заманының зардабын, соғыстың ауырлығын жақсы білетін, жастайымнан жаным сезетін жандардың бірімін. Өйткені, әкемнің екі ағасы Ұлы Отан соғысында қаза болған. Қазір адамзат әлемі бұрын-соңды болмаған соғыс қаупінен арылмай тұр.
Бұл соғыста жеңімпаз болмайды, бәрі де жеңіледі. Мұндай жағдайда біреудің сойылын соғу – нағыз соқырлық, ал өз ұлтыңа қарсы тұру – қаныпезерлік болар еді», — деді ҰҚШҰ Бас хатшысы.
Өткен ғасырларда орын алған оқиғаны еске сала келіп, осы уақытқа днйін істеген жұмыстары үшін халық алдында ұялмайтынын айтты.
«Барымта жасаған қазақтың 5-6 жігітіне жергілікті орыстың соты үкім шығарып, итжеккенге айдап жатыр екен. Сонда сол елдің ағасы болған бір ақсақал көзінен парша-парша жас ағып жылап тұр екен. Жандағылар: «Әу, ақсақал, неге жылайсыз? Оры жазасын алды, әділ емес пе?» деген екен. Сонда ақсақал: «Қазақтардың бақсы емеспін, әрқайсының белінде он-оннан кететін баласы үшін жылап тұрмын», – деген екен. Осыдан кейін өз қазағын соғысқа тартып жатыр деген қасаң әңгімеге қалай сенесің?
Білемін, тұтас ойдан оймақтай сөзді жұлып алып, жұртқа жар салатындар болған, бола береді де.
Өз тарапымнан халқым айтатыным – әр нәрсеге ақылмен қарайық. Ал ақылды сақтайтын мінез деген сауыты бар, сол мінез бұзылмасын. Әрине, әлеуметтік желіде отырып, мән-жайды анықтамастан жалған ақпарат таратудың өте оңай, қиыны – ар алдындағы жауап.
Әбіш Кекілбаев ағамыз айтпақшы, арлы адам – ең күшті адам. Өйткені ол өткінші бақыттың, өткінші қайғының ырқына мойын ұсынбайды. Сондықтан оның тағдыры қиын болуы, ауыр болуы мүмкін, өкінішті болуы мүмкін емес.
Менің де өмірімде ел-жұртым сеніп, мойныма артқан қай қызмет, қандай жұмыс болсын, ұялатын жерім жоқ. Мен үшін халқымыздың мүддесінен биік ешнәрсе болған емес. Бүгін де елден жырақ жүрсем де, туған елдің әрбір жетістігі – жемісім мәнді, сағынышым тәтті.
Әрине, мен үшін еліміздің сенімінен шығу жолында, мемлекетіміздің мүддесін сыртта сақтап, қорғаудың маңызы өте зор. Оған қоса, мұндай мәртебелі міндеттің үдесінен шығу да халқымыздың рухани қолдауына тікелей байланысты», — деген Тасмағамбетов халықты Ораза айт мерекесімен құттықтады.
