Журналист Гүлмира Әбіқай еліміздегі жол бойындағы дәретханалардың жағдайын сынға алды. Ол бұл туралы Facebook парақшасында жазып, Алматыдан Бурабайға жасаған сапарында көргендерін баяндады, деп хабарлайды Todayinfo.kz ақпарат агенттігі.
Әбіқайдың айтуынша, Балқаш маңындағы жанармай бекетінде орналасқан дәретхана ластанғаны соншалық, кіріп-шықпақ түгілі жақындау мүмкін болмаған. Ал @royalpetrol.kz бекетінде санитарлық торапқа кіру үшін 100 теңге төлеу керек, бірақ ондаған адам кезекте тұрғанын айтады.
«Кассир қыздардың айтуынша, дәретхананы жуып-шаю олардың міндетіне кірмейді, себебі арнайы қызметкер бөлінбейді. Миллиондаған табыс тауып отырған станция басшылары техничкаға жалақы төлеуден қашады. Ал еңбек инспекторлары бұған көз жұма қарайды», – дейді журналист.
Ол сондай-ақ, Қарағанды маңындағы ірі жанармай құю бекетінде су жоқ болғандықтан, дәретхананың жабық тұрғанын атап өтті. «Жол салығын, автосалықты төлейміз, бірақ жол бойындағы дәретхананың өзі проблемаға айналған», – деп жазды ол.
Әбіқай құзырлы министрлікті мәселені назарға алуға шақырды.
Фото: Caravan.kz
