Жамбыл облысында тұрғын үй мәселесі кезең-кезеңімен шешіліп, жаңа алқаптар мен шағын аудандар бой көтеруде. Биылғы жылдың басынан бері өңірде 586,7 мың шаршы метр тұрғын үй пайдалануға берілді, ал 2025 жылға жоспар бойынша 765 мың шаршы метрді пайдалануға беру көзделген, деп хабарлайды Todayinfo.
«Қазіргі уақытта 46 тұрғын үйдің құрылысы жүргізілуде, жалпы саны 2 190 пәтерді құрайды. Көптеген үйлер Отбасы банкі арқылы кредиттік үйлер ретінде сатылуда. Жыл соңына дейін 1200 пәтерлі 20 тұрғын үйді пайдалануға беру жоспарланып отыр, биыл қазірдің өзінде 540 пәтерлі 10 тұрғын үй пайдалануға берілген», — деді облыс әкімі Ербол Қарашөкеев.
Сонымен қатар, көпбалалы отбасылар мен әлеуметтік осал топтар үшін 710 пәтер сатып алу қарастырылған, жалпы қаржы көлемі 21,5 миллиард теңге. «Әулие ата жастары» бағдарламасы аясында 140 жас отбасы баспанамен қамтамасыз етілді.
«Тұрғын үй саласында кезең-кезеңмен жүргізіліп жатқан жұмыстар өңір тұрғындарының тұрмыс сапасын арттыруға бағытталған. Әсіресе жастар мен әлеуметтік осал топтарды қолдау – басты басымдықтардың бірі. Біз алдағы уақытта да тұрғын үй бағдарламаларын белсенді түрде жүзеге асырамыз», – деді әкім.
Фото: Freepik
