Италия астанасындағы Пренестино ауданында орналасқан жанармай құю бекетінде ірі жарылыс болып, 45 адам жарақат алды, деп хабарлайды Todayinfo.
Елдің төтенше жағдайлар қызметінің мәлімдеуінше, екі ауыр жағдайда жатыр.
Алдын ала мәліметке сәйкес, жарылыс сұйытылған табиғи газдың ағып кетуінен болған. Ол жерде газ баллондары, бензин болған. Қатты дүмпуден бекет маңындағы спорт кешені де зақымданған.
Куәгерлердің айтуынша, жарылыстан кейін көкке көтерілген қою қара түтін Римнің бірнеше ауданынан байқалған. Жергілікті тұрғындар қатты дүрлігіп, қауіпсіз жерге эвакуацияланған. Қала мэрі Роберто Гуалтьери оқиға орнына барып, зардап шеккендерге көмек көрсету үшін барлық күш жұмылдырылатынын мәлімдеді.
«Біз бұл жағдайды жіті бақылауда ұстап отырмыз. Қазір басты мақсат – тұрғындардың қауіпсіздігін қамтамасыз ету», – деді мэр.
Қазір оқиға орнында өрт сөндірушілер, құтқарушылар мен полиция жұмыс істеуде. Тергеу амалдары басталып кетті. Жарылыстың нақты себебі алдағы уақытта анықталмақ.
