Қазақстанда әскерге шақыру тәртібі өзгереді. Қорғаныс министрлігінің мәліметінше, 16 қыркүйектен бастап SMS-хабарламалар дәстүрлі қағаз повесткалармен теңестіріледі, деп хабарлайды Todayinfo.kz.
SMS қалай жұмыс істейді?
Әскер қатарына шақырылушыларға хабарлама үш күн бұрын жіберіледі. SMS-те азаматтың медициналық тексерістен өту үшін әскери комиссариатқа қай күні және қай мекенжайға баруы керектігі көрсетіледі. Медициналық тексерістен кейін шақыру комиссиясы шешім қабылдайды.
Сонымен қатар хабарламалар eGov порталының жеке кабинеті арқылы да жіберілуі мүмкін.
Бірнеше нөмір тіркелсе ше?
Министрліктің түсіндіруінше, егер азаматтың атына бірнеше абоненттік нөмір тіркелген болса, SMS барлық нөмірге бірдей жолданады. Бұл шақырудан қалмауға мүмкіндік береді.
Ал егер азаматтың телефон нөмірі туралы дерек базада жоқ болса, повестка қағаз түрінде қолхатпен беріледі немесе пошта арқылы тіркелген мекенжайына, уақытша тұрып жатқан жеріне не жұмыс орнына жеткізіледі. Құжатты военкомат қызметкері, ұйым басшысы немесе пошташылар табыстай алады.
Қорғаныс министрлігі қағаз түріндегі повесткалардан толықтай бас тарту жоспарланбайтынын да атап өтті.
Қашан күшіне енеді?
Шілде айында Президент қол қойған заңға сәйкес, өзгерістер 60 күннен кейін, яғни 16 қыркүйектен бастап ресми түрде күшіне енеді. Осы күннен бастап қазақстандықтар SMS арқылы повестка ала бастайды.
2025 жылғы күзгі әскерге шақыру
Биылғы күзгі шақырылу науқаны 1 қыркүйектен 31 желтоқсанға дейін өтеді. Бұған дейін ол 1 қазанда басталатын. Қорғаныс министрлігі жаңа ережелерді енгізу арқылы шақыру процесін біріздендіруді көздейді.
