Түркістан облысының орталығында салынатын әлеуметтік және коммерциялық нысандар бірыңғай сәулеттік талаптарға сай бой көтермек. Бұл туралы облыс әкімінің бірінші орынбасары Зұлпыхар Жолдасовтың төрағалығымен өткен штаб отырысында белгілі болды, деп хабарлайды Todayinfo ақпараттық агенттігі өңірдің баспасөз қызметіне сілтеме жасай отырып.
Жиын барысында Түркістан қаласында және облыс аумағында салынуы жоспарланған нысандардың сәулеттік үлгілері мен жобалық ұсыныстары қаралды.
Сәулетшілер, құрылыс саласының мамандары және инвесторлар қатысқан жиында жаңа жобалардың таныстырылымы өтті. Атап айтқанда, Түркістан қаласында бой көтеретін филармония мен көркемсурет галереясына арналған жер телімдері ұсынылды. Сонымен қатар қала аумағында 5 қабатты тұрғын үй кешені мен таунхаус салу жобалары таныстырылды. Ұлттық, азиялық және еуропалық тағамдарды ұсынатын көпфункционалды мейрамхана кешенінің де жобасы ұсынылды.
Жиын барысында Түркістан қаласының бас жоспарына енгізілетін өзгерістер мен толықтырулар, сондай-ақ «Дизайн код» бойынша ұсыныстар талқыланды. Бұл құжат қалада салынып жатқан нысандардың бірыңғай стильде, үйлесімді салынуын қамтамасыз етуді көздейді.
Облыстық сәулет және қала құрылысы басқармасының басшысы Нұрлыжан Букебаев аудан және қалалардағы әлеуметтік нысандарды біркелкі сәулеттік үлгіде салу және коммерциялық нысандарды заманауи талаптарға сай абаттандыру қажеттігін айтты.
Облыс әкімінің бірінші орынбасары Зұлпыхар Жолдасов ұсынылған жобаларды мұқият саралап, нақты жоспар мен мерзімді айқындау қажет екенін атап өтті. Оның айтуынша, әрбір жоба қаланың сәулеттік келбетіне сай болуы шарт және тарихи-мәдени ерекшеліктерді сақтау басты назарда болуы тиіс.
Жиын соңында қатысушылар тарапынан қосымша ұсыныстар айтылып, жобаларды жетілдіру бойынша тапсырмалар берілді. Түркістанды заманауи және ұлттық келбеті үйлескен қала ретінде дамыту бағытындағы жұмыс жалғасуда.
