Қырғызстанның альпинистер федерациясының басшысы Эдуард Кубатов ресейлік альпинист Наталья Наговицынаның өлімін растап, барлық құтқару операциялары тоқтатылғанын мәлімдеді, деп хабарлайды Todayinfo.kz.
Альпинистер федерациясының басшысы Эдуард Кубатов Instagram-дағы парақшасында 2 қыркүйек күні «Жеңіс» шыңынан дрон түсірген видеоны жариялады. Оның сөзінше, дронның көмегімен альпинист әйел жатқан шатырды жан-жағынан түсіріп, тексерген.
«Өкінішке орай, біз Наталья Наговицынаның өмір белгілерінің жоқтығын мәлімдеуге мәжбүрміз. Барлық құтқару операциялары тоқтатылды. Біз бұл қайғылы жағдайды мойындауымыз қажет. Дронмен түсірілген бейнематериалдың барлығы Натальяның ұлына тапсырылады», — деп жазды Кубатов.
Ол қырғызстандық тарап альпинист әйелді құтқару үшін қолдан келгеннің бәрін жасағанын алға тартты. Алайда биіктік, ауа райы жағдайы, тікұшақтың қона алмауы мен құтқарушылардың физикалық жағдайы қалаған нәтижеге жетуге мүмкіндік бермеді.
«Жеңіс» шыңының тарихында 7200 метр биіктікте бірде-бір сәтті құтқару операция болмаған. Біз құтқарушылардың өмірін қауіп-қатерге тігуге қақымыз болмады», — деді федерация басшысы.
Фото: https://t.me/ENews112
Посмотреть эту публикацию в Instagram
