Ел Конституциясының 30 жылдығы аясында Жетісу облысында тәулігіне 120 тонна жүгері дәнін кептіретін цехы бар құрамажем зауыты ашылды. Экспортқа бағытталған кәсіпорын Панфилов ауданының Жаркент қаласында іске қосылды, деп хабарлайды Todayinfo ақпараттық агенттігі Жетісу облысы әкімінің баспасөз қызметіне сілтеме жасап.
Қазақстан-Қытай бірлескен жобасының жүзеге асырылуы нәтижесінде аудан экономикасына 500 млн теңге инвестиция тартылып, 30-дан астам тұрақты жұмыс орны ашылды.
– Кептіру кешені бар зауыттың іске қосылуы жергілікті шаруаларға үлкен қолдау болып отыр. Енді фермерлер өз өнімдерін жылдам әрі сапалы кептіруге мүмкіндік алады. Озық технологияларды пайдаланудың арқасында өңдеу шығыны барынша азайтылып, шикізатты ұзақ мерзім сақтауға жол ашылады. Бұл өз кезегінде ауыл шаруашылығы тауарын өндірушілердің табысын арттыруға және өңір экономикасының дамуына ықпал етеді, – деді нысанның ашылуына қатысқан Панфилов ауданының әкімі Марат Сағымбек.
Зауыттың техникалық ерекшеліктері және алдағы даму жоспары жайлы зауыт директоры Ербол Өрнекеев айтып берді.
Оның айтуынша, кәсіпорынның құрылысы өткен жылдың қыркүйегінде басталған. Зауытқа орнатылған Қытайда өндірілген қондырғылардың көмегімен тәулігіне 110 тонна түйіршіктелген жем шығаруға мүмкіндік бар. Дайын өнім Қытайға, Иранға, Өзбекстанға экспортталмақ.
– Біз жергілікті шаруалардан 50 тонна жүгері дәнін қабылдай аламыз, ал толық қуатына шыққанда екі ауысымда жұмыс істеп, айына малға, құсқа, балыққа арналған 200 мың тоннадан астам жем өндіреміз. Өнім сапасын арнайы зертханамызда қадағалаймыз, – деді Е. Өрнекеев.
Атап өтсек, биыл Жетісу облысында жүгері алқабы 42,2 мың гектарды құраса, соның 23,1 мың гектары Панфилов ауданының үлесінде. Егістіктен кемінде 300 мың тонна шикізат жиналады деп күтілуде.
Фото: Нұрбол Қанағат
