Астанада «Жұмысшы мамандықтар қаласы» таныстырылып, кәсіптік білім беру саласындағы жаңа реформаның аясында арнайы көрме ұйымдастырылды, деп хабарлайды Тodayinfo ақпараттық порталы.
Іс-шараның басты мақсаты — жастарды кәсіптік-техникалық білімге баулу, мамандық таңдауда қолдау көрсету және мемлекеттік бастамаларға деген сенімді арттыру. Бұл туралы Қарағанды облысы әкімінің орынбасары Әлібек Әлденей жазды.
«Көрмеге Қарағанды және Теміртау қалаларындағы Жоғары политехникалық колледждер қатысты. Павильондарда аймақтың негізгі индустрия саласы саналатын металлургия бағыты бойынша мамандар даярлайтын оқу орындарының жетістіктері көрсетілді. Сонымен қатар, «Құрылысшылар көшесі» бөлімінде Қарағанды техника-құрылыс колледжінің павильоны жұмыс істеді», — деп жазды облыс әкімінің орынбасары Әлібек Әлденей.
Фестиваль аяқталғаннан кейін «Жұмысшы мамандықтар қаласы» платформасы мобильді қосымша форматында жұмысын жалғастырады.
Жобаның басты ерекшелігі — мемлекет, бизнес және қоғамның өзара әрекеттесуін қамтамасыз ете отырып, жұмысшы мамандықтарды индустрия мен өңірлік дамудың негізгі драйверіне айналдыру.
