«Жұмысшы мамандықтар жылы» аясында Түркістан облысында колледж түлектеріне арналған «Адал азамат, адал еңбек, адал табыс» атты форум өтті. Іс-шара барысында кәсіпорындардың өндірістік әлеуеті таныстырылып, техникалық және кәсіптік білім беру ұйымының түлектеріне арналған кәсіптік бағдар беру кездесулері өткізілді. Сонымен бірге бос жұмыс орындарының жәрмеңкесі ұйымдастырылып, өңірдегі және республикалық деңгейдегі ірі кәсіпорындар жастар мен жұмыс іздеушілерді жұмысқа қабылдады.
Маңызды іс-шараға Түркістан облысының әкімі Нұралхан Көшеров арнайы қатысып, жастарды жұмыспен қамту – басым бағыттардың бірі екенін айтты.
Ауқымды іс-шараны Облыстық білім басқармасы мен Облыстық жұмыспен қамтуды үйлестіру және әлеуметтік бағдарламалар басқармасы және облыстық «Еңбек мобильділігі орталығы» КММ бірлесіп ұйымдастырды.
Іс-шарада жастарды жұмыспен қамту мақсатында облыстағы ірі кәсіпорындар мен техникалық және кәсіптік білім беру ұйымдары және «Еңбек мобильділігі орталығы» арасында 3 жақты өзара ынтымақтастық Меморандумдары түзілді.
Жәрмеңкеге Түркістан облысы бойынша 40-тан аса жұмыс беруші қатысып, 1 500-ден астам бос жұмыс орнын ұсынды. Түлектерге әлеуметтік әріптестер тарапынан жұмысқа орналастыру сертификаттары табысталды.
Кәсіпорындар өз жұмыстарын насихаттап, талапқа сай мамандығы, білімі, тіпті жұмыс тәжірибесі жоқ азаматтар да өзіне лайықты қызмет түрін табуға мүмкіндік алды.
Ұсынылған бос жұмыс орындарының 75% немесе 1 163-і – өнеркәсіп саласындағы іске асырылып жатқан инвестициялық жобалардың үлесінде, 162-сі ауыл шарушылғы саласына тиесілі. 2 мыңнан астам жұмыс іздеушіге инженер, аудармашы, есепші, заңгер, механик, электрик, дәнекерлеуші, жұмысшы, оператор, технолог, жүргізуші, педагог, тәрбиеші, тігінші, аспаз, лаборант, күзетші, қасапшы, IT-маман, программист және өзге де 100-ден астам мамандықтар ұсынылды.
