«2025 – Жұмысшы мамандықтар жылы» аясында: Жаратылыстану мен математикалық ғылымдардағы жасанды интеллект мәселелеріне арналған халықаралық конференция өтті.
2025 жылдың 12 мамырында Астана қаласында «2025 – Жұмысшы мамандықтар жылы» шеңберінде ел болашағы үшін маңызы зор білім беру саласындағы айтулы шара – «Жаратылыстану мен математикалық ғылымдар саласындағы жасанды интеллект: инновациялар және келешек мүмкіндіктері» атты халықаралық ғылыми-практикалық конференция өтті. Шараны Астана қаласы әкімдігінің «Әдістемелік орталығы» мемлекеттік коммуналдық қазыналық кәсіпорны ұйымдастырып, Ы. Алтынсарин атындағы Ұлттық білім академиясы қолдау көрсетті. Іс-шара №101 мектептің базасында өтті.
Конференция мақсаты – жасанды интеллект (ЖИ) технологияларының жаратылыстану және математикалық ғылымдар саласына ықпалын бағалау, білім беру жүйесіне енгізудің нақты жолдарын айқындау және педагогтер мен зерттеушілер арасында тәжірибе алмасудың кәсіби алаңын қалыптастыру.
«Мамандықтар жылы» аясында ұйымдастырылған бұл ғылыми форум жалпы орта, техникалық және кәсіптік, арнайы және қосымша білім беру ұйымдарының педагогтерін, сондай-ақ ЖИ мен STEM технологияларына қызығушылық танытқан мамандарды біріктірді. Қатысушылар өздерінің ғылыми мақалаларын, баяндамаларын ұсынып, тәжірибелерімен бөлісті.
Пленарлық отырыста білім беру, инженерия, физика-математика және бағдарламалау салаларындағы тәжірибелі ғалымдар мен сарапшылар өз баяндамаларымен бөлісті. Атап айтқанда:
– Арман Сағатұлы Қабдушев – ҚР Оқу-ағарту министрлігіне қарасты Ұлттық білім академиясының аға ғылыми қызметкері, техника ғылымдарының магистрі;
– Альмир Аскарович Анияров – Астана халықаралық университетінің қауымдастырылған профессоры;
– Нұрсұлтан Бақтыбайұлы Өрісбай – «A’LEM» педагогикалық инновациялар орталығының директоры;
– Марлен Мәукенұлы Илипов – PhD докторы, физика және компьютерлік технологиялар маманы;
– Серғазы Ахметқұл – Amansultan білім беру платформасының даму директоры;
– Амина Құдабаева – ROQED компаниясының әдіскері;
– Александр Абасович Пащенко – Қостанай қаласындағы №7 мектептің информатика пәнінің педагог-шебері;
– Одилбек Каттаев – халықаралық сарапшы, SUNY және Westminster университеттерінің магистрі;
– Серік Амангелдіұлы Нүркенов – Астана халықаралық университетінің қауымдастырылған профессоры;
– Дилара Қырымқызы Құсаинова – Назарбаев Университетінің түлегі, Гарвард Жоғары білім мектебіне қабылданған, Teach for Qazaqstan менеджері;
– Ирина Сергеевна Храмей – Қостанай политехникалық жоғары колледжінің IT бойынша директор орынбасары;
– Әсет Ерікұлы Ысқақ – жетекші инженер-конструктор, инженерия магистрі;
– Ержар Сәдуақасұлы Ибышев – педагогика ғылымдарының докторы, профессор.
Баяндамаларда жасанды интеллекттің пәндік оқытудағы интеграциялық мүмкіндіктері, нақты мысалдар мен инновациялық платформалар арқылы білім сапасын арттыру жолдары қозғалды. Қатысушылар өзара пікір алмасып, ЖИ-дің келешекте ұстаз мамандығын қалай өзгертетіні жайлы көзқарастарын ортаға салды.
Конференция пленарлық отырыстан кейін секциялық бағыттар бойынша жалғасты. Әр секцияда салалық тәжірибелер мен аймақтық ерекшеліктер ескерілген ғылыми-практикалық ұсыныстар талқыланды.
Шара соңында барлық ұсыныстар мен материалдар жинақталып, білім беру саласындағы инновациялық көзқарастар мен озық тәжірибелерді біріктіретін арнайы ғылыми жинақ ретінде жарияланатын болды.
Бұл конференция – Қазақстанда өтіп жатқан «2025 – Мамандықтар жылы» шеңберіндегі сапалы білім беру мен заманауи технологияларды біріктіру бағытындағы нақты қадамдардың бірі. Жасанды интеллектпен ұштасқан білім беру саласы – болашақ кәсіби ұрпақты даярлаудың кілті.
