Фото: коллаж Sn.kz
Жас жазушы Әлихан Жақсылық әлеуметтік желіде жариялаған жазбасында айтысшы Жүрсін Ерманға ренішін білдірді, деп хабарлайды Todayinfo ақпарат агенттігі.
Жас жазушы, бірнеше кітаптың авторы Әлихан Жақсылық белгілі айтыс ақтаңгері Жүрсін Ерманның сөзіне қатысты пікір білдірді. Ол әлеуметтік желідегі парақшасында жариялаған жазбасында Жүрсін Ерманның өзіне қатысты айтқан сөздерін түсінбегенін, тіпті ренжігенін жеткізді.
Жазушының реніші неден туындады?
Әлихан Жақсылықтың айтуынша, Жүрсін Ерман жергілікті «Қызылорда» телеарнасына берген сұхбатында оны «жын-шайтан туралы жазады» деп айыптағандай болған.
«Қолдан жасалған қайғы-қасіреттер жазады» деген сөзіне түсінбедім. Мен ешқашан өзім жайлы немесе жеке басым туралы жазған емеспін. Жүрсін Ерман атамыз нені меңзеп, қай шығармам жайлы айтып отырғанын білмедім», – деп жазды Әлихан Жақсылық.
«Мен тек өз шығармаммен айналысамын»
Жазушы Жүрсін Ерманның пікіріне таң қалғанын және өз шығармашылығына қатысты сынның әділетсіз екенін айтты.
«Ата! Мен біреулер құсап еңіреп жылап, қолдан тағдыр жасап жүрген жоқпын. Мен тек бар нәрсені жазамын, кітабымды сатып, өз жолыммен жүремін. Шайтанға ерді дейтіндей қандай әрекет жасадым?» – деп наразылығын білдірді жазушы.
Жүрсін Ерман не деді?
Айтыс ақтаңгері Жүрсін Ерман «Қызылорда» телеарнасына берген сұхбатында әдебиетке бет бұрған жас жазушылар туралы ойын ортаға салған болатын. Сол кезде ол Әлихан Жақсылықты мысалға келтіріп, оның шығармашылығына қатысты пікір білдірді.
«Қазіргі жастар тайыз суда жүрген қайық сияқты. Көңіл көншітпейді. Қолдан жасаған қайғы-қасіреттері бар. Соны айтады. Жын-шайтан соны жазады. Әлихан Жақсылық деген жігіт болды ғой бізде. Соны әуелде әлпештеп едік. Соның жолына түсіп кетті. Осындай жастар көбейіп кетті. Біреудің жолын кесейін дегенім жоқ. Өмірдің ақиқатын жазу керек», – деді Жүрсін Ерман.
Қартаю мен көзқарас қайшылығы
Бұл пікірталас тек бір жазушы мен бір ақынның арасындағы қарама-қайшылық емес, аға буын мен жас буын арасындағы түсініспеушіліктің көрінісі. Уақыт өткен сайын әр ұрпақтың өмірге, әдебиетке, өнерге деген көзқарасы өзгереді. Жүрсін Ерманның пікірі – дәстүрлі көзқарасты ұстанған буынның ойы болса, Әлихан Жақсылық – жаңа заманның өкілі.
Жасы ұлғайған сайын адамның өмірлік тәжірибесі артады, бірақ ол әрқашан жаңа буынның көзқарасын толық түсіне бермеуі мүмкін. Бұл жағдай қазақ әдебиетінің жаңа буыны мен аға буын арасындағы көзқарастар айырмашылығын айқын көрсетіп отыр.
