Прокуратура Қостанай облыстық Білім басқармасының қисынсыз әрекеттерін анықтады, деп хабарлайды Todayinfo.
Қостанай облысының әкімдігі мыңдаған ұстаздардың құқығын бұзып келген. Облыстағы заңсыздықтарды анықтаған прокуратура мыңдаған мұғалім өздеріне тиесілі қаражатты алмай келгенін хабарлады. Білім беру саласы қызметкерлерінің конституциялық құқықтары бұзылған. Қызметкерлерге зейнеткерлік жасқа жеткенде кепілдендірілген өтемақы және іссапар шығындары төленбеген.
«Жұмыстан босату туралы бұйрықтарда зейнеткерлік жасқа толуына байланысты шартты бұзу туралы көрсетілмей, еңбек шарты тараптардың келісімі бойынша немесе қызметкердің өтініші бойынша бұзылғаны атап өтілді. Барлығы 350 қызметкер анықталды, оларға 38 миллион теңгеден астам өтемақы төленбеген.
Сонымен қатар, білім бөлімдері мемлекеттік тапсырыс шеңберінде біліктілікті арттыру курстарынан өткен педагогтарға іссапар шығындарының төленбегені анықталды. Конституциялық құқықтары бұзылған және оларға 185 миллион теңгеден артық төленбеген 1,8 мыңнан астам педагог анықталды», — делінген хабарламада.
Қадағалау актілері бойынша 60 миллион теңгеден астам сомаға төлемдер жүргізілген 405 мұғалімнің құқықтары қорғалды. Қалған қызметкерлерге төлемдер жақын арада төленетіні айтылды.
Қостанай облысының прокуратурасы білім беру саласындағы заңнаманың сақталуын қадағалап, анықталған заңбұзушылықтарды жою үшін шаралар қабылдап жатыр. Бұл мұғалімдердің құқықтарын қорғауға және «Заң және тәртіп» қағидатының сақталуын қамтамасыз етуге мүмкіндік бермек.
