Қарағанды облысының Саран қаласында «Сұңқар» стадионында алғашқы Freedom ALGA футбол фестивалі ұйымдастырылды. Шараға өңірдің 10 мектебінен 400-ге жуық оқушы қатысып, қимыл-қозғалыс ойындарына, эстафеталар мен жолдастық кездесулерге шықты, деп хабарлайды Todayinfo ақпараттық агенттігі.
Қарағанды облысы әкімінің орынбасары Әлібек Әлденей шараның маңызын атап өтті.
«Бұл мен үшін жай ғана салтанатты шара емес, спорттың болашағымен жүздескен сәт болды. Балалардың қуанышты жүздері мен алаңдағы шабытты ойыны тағы бір мәрте футболдың жай ғана спорт емес, бірліктің, татулықтың және әділ ойынның мектебі екенін айғақтады», – деді ол.
Әлібек Әлденейдің айтуынша, қазақ футболының тарихында есімдері алтын әріппен жазылған саңлақтар Қарағандыдан шыққаны белгілі.
«Біздің бүгінгі парызымыз – сол дәстүрді жаңғыртып, жалғастыру, жаңа буын чемпиондарды тәрбиелеу», – деді ол.
Фестиваль Freedom Holding Corp. компаниясының қолдауымен өтті.
«Осы мақсатқа жетуде өңіріміздің әлеуетіне сенім артып отырған Freedom Holding Corp. компаниясының қолдауы үлкен демеу болды»,- деді облыс басшысының орынбасары.
Қазіргі таңда жоба облыстың 10 мектебін қамтып отыр. Алдағы уақытта оны аймақтағы барлық білім ордасына енгізу жоспарлануда. Бұл бастаманың әлеуметтік маңызына да назар аударылды.
«Австралиялық қылмыстану институтының ғалымдары спортпен тұрақты айналысқан жастардың денсаулығы нығайып қана қоймай, құқықбұзушылық азайып, мінез-құлқы түзелгенін дәлелдеді», – деді Әлібек Әлденей.
Шара соңында облыс әкімінің орынбасары футболдың жастарға тәртіп пен табандылықты үйрететінін атап өтті.
«Футбол қоғамды біріктіреді, жаңа спорттық индустрияны қалыптастырып, еліміздің халықаралық аренадағы мәртебесін көтереді. Олай болса, бүгінгі қадам – мықты, салауатты, жасампаз қоғам қалыптастырудың, қуатты экономика құрудың кепілі», – деп түйіндеді ол.
