Солтүстік Қазақстан облысының орталығы Петропавлда интернет-алаяқтықтың алдын алуға бағытталған жаңа алгоритм өз тиімділігін көрсетті. Бір апта ішінде полиция мен жекеменшік күзет қызметі зейнеткерлердің қаржысын заңсыз иеленуге бағытталған бірнеше әрекетті дер кезінде анықтап, жалпы сомасы 7 миллион теңгеден асатын қаражатты сақтап қалды, деп хабарлайды Todayinfo.
Жыл басынан бері облыс аумағында 270-тен астам интернет-алаяқтық фактісі тіркелген. Бұл — өңірдегі жалпы қылмыстық істердің төрттен бір бөлігін құрайды. Осыған орай, Солтүстік Қазақстан облыстық Полиция департаментінің бастамасымен Петропавл қаласында интернет-алаяқтыққа қарсы күресте жаңа алгоритм енгізілді.
Алгоритмнің мәні – сауда-ойын-сауық орталықтарында кезекшілік ететін полиция мен күзет қызметкерлерінің банкоматтар маңында абдырап, телефон арқылы сөйлесіп тұрған егде жастағы адамдарға назар аударып, қажет жағдайда шұғыл әрекет етуі.
Алаяқтар жиі қолданатын схемалар: «Сіздің атыңызға несие рәсімделді», «Анашым, мен жол апатына түстім» деген жалған хабарламалар арқылы азаматтарды үрейге салып, ірі көлемдегі қаражатты «қауіпсіз шотқа» аударуға мәжбүрлеу.
Мәселен, сауда орталықтарының бірінде полиция қызметкері банкомат жанында тұрған 74 жастағы зейнеткерді байқап қалады. Әйел адамға өзін банк қызметкері ретінде таныстырған белгісіз тұлға хабарласып, оның атына несие рәсімделгенін айтып, одан құтылу үшін қаражатты «қауіпсіз шотқа» аударуды талап еткен. Уақытылы араласудың арқасында 500 мың теңге көлеміндегі заңсыз операцияның жолы кесілді.
Осыған ұқсас жағдайда 75 жастағы тағы бір зейнеткер белгісіз нөмірге дәл сондай сомада ақша аударуға тырысқан. Алаяқ өзін алдымен ұлы, кейін немересі ретінде таныстырып, шұғыл қаржы сұраған. Қырағылық танытқан күзетші полицияны шақырып, оқиға орнына жедел жеткен тәртіп сақшылары зейнеткердің алаяқпен сөйлесіп жатқанын анықтап, оның қаржысын сақтап қалды.
Үшінші жағдайда егде жастағы ерлі-зайыпты 6 миллион теңгесінен айырылып қала жаздаған. Олар да «несие рәсімделді» деген хабарлама алып, алғашқыда 1,5 миллион теңгені аударып үлгерген. Полицейлердің түсіндіру жұмысының арқасында қалған 4,5 миллион теңге дер кезінде сақталып қалды. Алаяқтардың сөзіне сенген зейнеткерлер басында полицияға сенбеген.
Барлық жағдай бойынша жедел-іздестіру іс-шаралары жүргізілуде. СҚО Полиция департаменті бастығының бірінші орынбасары Асқар Мұхаметқалиевтің айтуынша, бұл әдіс тиімді нәтижесін беріп отыр. Алдағы уақытта осы алгоритмді жетілдіру, кеңейту және атсалысқан қызметкерлерді ынталандыру көзделіп отыр.
Полиция зейнеткерлерге ерекше назар аударуға шақырады. Азаматтарға жақындарын, көршілерін банкомат маңында жалғыз қалдырмау, оларға алаяқтардың схемаларын түсіндіріп отыру ұсынылады. Ең бастысы – қандай да бір күмәнді жағдайда асықпай, банкке ресми нөмір арқылы немесе бірден «102» нөміріне қоңырау шалу қажет.
