Ішкі істер министрлігі әлеуметтік желілер мен онлайн платформаларда белсенді әрекет ететін алаяқтар туралы қазақстандықтарға ескерту жасады, деп хабарлайды Todayinfo ақпараттық агенттігі.
Министрліктің мәліметінше, соңғы уақытта желі қолданушыларының кейбірі өздерін шетелдік азамат ретінде таныстыратын алаяқтардың қармағына түсіп қалуда. Олар әдетте өздерін махаббат іздеп жүрген шетелдіктер ретінде көрсетіп, жылы сөздермен сенімге кіреді, виртуалды қарым-қатынас құрып, артынша әртүрлі сылтаулармен ақшалай көмек сұрайды.
ІІМ онлайн алаяқтықтың кең таралған белгілерін атап көрсетті:
- Ғашықтық сезімін тым тез білдіру;
- Бейнеқоңырау немесе жеке кездесуден үзілді-кесілді бас тарту;
- Қиын өмірлік жағдайлар туралы айтып, аяныш тудыру;
- Ақша, құжаттар немесе бағалы заттарды жіберуді сұрау.
Бүгінде интернет алаяқтық Қазақстан бойынша кең етек жаюда. ІІМ деректеріне сүйенсек, 2025 жылдың алғашқы алты айында 12 мыңнан астам интернет-алаяқтық фактісі тіркелген. Бұл көрсеткіш жыл сайын артып келеді. Оның ішінде романтикалық алаяқтық, инвестициялық жалған ұсыныстар мен онлайн дүкендер арқылы алдау сынды тәсілдер кеңінен қолданылады.
« Қазіргі цифрлық заманда алаяқтар адамдардың сенімін пайдалану арқылы оңай олжаға кенелуге тырысады. Әсіресе жалғыз жүрген адамдар мен егде жастағы азаматтар жиі құрбанға айналады. Сондықтан бейтаныс адамдарға бірден сенбеуге, әсіресе ақша аудару туралы өтініштерге сақ болуға кеңес береміз», – деп мәлімдеді ІІМ өкілдері.
Министрлік азаматтарды әрдайым мұқият болуға шақырады. Әлеуметтік желілер мен мессенджерлер арқылы танысқан адам сізден ақша, құжат немесе құнды зат сұраса, бірден күмән келтіріп, ақпаратты тексеру қажет.
Күдік тудырған жағдайда міндетті түрде 102 нөміріне хабарласыңыз. Бұл – сіздің қаржылық қауіпсіздігіңізді қорғаудың ең тиімді жолы.
«Желі қолданушыларының кейбірі өздерін махаббат іздеп жүрген шетелдіктер ретінде көрсететін алаяқтардың құрығына түсіп қалып жатыр. Мұндай алдамшы онлайн махаббаттың соңы тек жаралы жүрек пен бос әмиянға әкеп соғады», — деп жазады ішкі істер министрлігінің ресми сайты.
Полицияның айтуынша, алаяқтықтың бұл схемасы бір сценарийге ие. Яғни, алдымен олар әдемі танысады, романтикаға толы сөздер айтады, кездесеміз дейді, тіпті, үйленетініне сендіреді. Осындай схеманың құрбаны болған Астана қаласының тұрғыны интернет арқылы танысқан адамына сеніп, тоғыз миллион теңгесінен айырылған. Бастапқыда романтикалық хат-хабар алмасудан басталған таныстық кейін үйлену туралы уәдеге дейін жалғасқан. Алайда, уақыт өте келе «шұғыл көмек қажет» деген өтініштер пайда болып, қаржы аударымдары сұралған.
«Бірақ, келе-келе басында әртүрлі қиындықтар бар екенін айтып, құрбанынан көмек сұрайды, ақша сұрайды. Осындай схемаға алданған Астана қаласындағы әйел өзімен интернет арқылы сөйлескен адамға сеніп, тоғыз миллион теңгесінен айырылған», — деп хабарлайды ІІМ.
