Танымал блогер Айсәуле Бақытбек әкесімен қарым-қатынасы туралы айтып берді, деп хабарлайды Todayinfo Stan.kz агенттігіне сілтеме жасап.
Желі жұлдызы салт-дәстүрді ұстанатын отбасында тәрбие алғанын жеткізді.
«Ата-анамның оқиғасынан екі ай бұрын Әлішермен екі жаққа кеткен едік. Ол кезде бірге бола алмайтынымызды түсіндік. Қатты стресс алып, күйзелісте жүрген едім. Мүмкін уақыт керек болған шығар?!
Бірақ мен ата-анамның көзімізше сөзге келіп, ұрысқанын көрмеппін. Сіңлім Айару да көрмеген. Ата-әжеміздің қолында өстік. Олар 80-жылдардағы адамдар болғасын бір-біріне дауыс көтеретін.
Ол оқиға мені қатты есейтіп жіберді. Америкаға кетемін деп билет алып қойған едім. Бірақ төрт айдан кейін ғана жолым түсті.
Анамды соққыға жыққанда бірден Әлішерді іздедім. Анамды ауруханаға, әкемді түрмеге алып кетті. Мен әкемнің жанында қалып, Әлішермен сөйлестім. Ол бірден мені жұбатуға тырысты.
Қасыма келетінін айтып, көңілімді аулады. Сол жылы менің өмір сүру режимім күрт өзгерді. Төрт ай бойы аурухана мен түрменің ортасында жүрдім. Таңертең түрмеге барамын, түсте ауруханаға анамның жанына келемін.
Әлішер жанымда болды, бірақ Америкаға кететін уақыты жақындағасын ол ұшып кетті. Содан кейін ойлана бастадым. Қыркүйекте мен де бәрін тастап, Америкаға кетіп қалдым. Ол кезде жағдай да тұрақталған еді», – деді блогер.
Айсәуленің сөзінше, бүгінде қыздары әкесімен араласып тұратынын жасырмады.
«Қыздарым “Бақытбек ата келе ме?” деп іздеп тұрады. Аталарын жақсы көреді. Араласып тұрамыз. Анам әуелден әкемізден ажыратқан жоқ. Біздің араласып тұруымызды талап етеді.
Осы оқиғадан кейін психологпен жұмыс істедік. Түрмеде отырғанда да әкеме барып тұрдым. Бірақ мен оны жұртқа қалай жеткізерімді білмедім. “Әкеммен сөйлесіп жатырмын” десем, “Анаңды өлтіре жаздаған адамды қолдайсың” деп айтады. Мен оның ісін қолдамаймын. Әкемді немерелерінен айыра алмаймын», – деді Айсәуле.
Фото:Instagram/ Айсәуле Бақытбек
