Түркістан облысының Сайрам ауданындағы Ақсукент ауылында «BELLA MEBEL» брендімен өнім шығаратын жиһаз фабрикасының өнімдеріне сұраныс артты. Жиһаз фабрикасы 2017 жылдың мамыр айынан бастап іске қосылған. Қазір мұнда жүзден аса адам тұрақты жұмыспен қамтылған, деп хабарлайды Todayinfo ақпараттық агенттігінің тілшісі.
Сапалы, бірегей тауар шығарып, көпшіліктің ықыласына бөленіп үлгірген компанияға деген сұраныс күн санап артып келеді.
«Жиһаз шығару ісі – отбасылық идея, отбасылық бизнес. Бұрыннан осы салада кәсіпкерлікпен айналасып келеміз. Бастапқыда Сербия мен Италияда жасалған жиһаздарды көтерме бағада саттық. Осылай бізге бұл істі бастауға ерекше құлшыныс, ықылас оянды. Кейін шетелдік, отандық бұйымдарды зерттеп, талдап брендтік атаумен өнім шығаруға бел будық. Бүгінде жұмысымызыдң нәтижесі жаман емес. Материалға қажетті заттарды Германия мен Италиядан алдырамыз, Одан бөлек өз еліміздің өнімдерінен де кеңінен пайдаланамыз. Қажетті мамандар өз еліміздікі. Есесіне 100-ден аса адам жұмыспен қамтылып отыр. Мұнда үздік ағаш ұсталары және оған көмекшілер, қажетті мамандар бар. Бренд деп шетелке ынтыққанымызбен дәл сол өнімдерді сапалы етіп өзіміз де жасай алатынымызға көзіміз жетті. Бағасы да қолжетімді. Қыз ұзатып, келін түсіріп шапқылаудан бөлек, бұйымдарын түгендеу де үлкен шаруа. Қыруар қаржыны талап етеді. Сондықтан әрбір ата-анаға алған тауары сапалы, қалтаға қонымды болғаны да тиімді. Осы мәселелерді де барынша ескердік»,- дейді «BELLA MEBEL» жиһаз фабрикасының басшысы Дилдора Нуриддинова.
Бүгінде компания Қазақстанның оңтүстік өңіріндегі жиһаз нарығында өз орнын ойып тұрып алды деуге болады. Бұл отбасылық бизнеске Дилдора Нуриддинова көп кәсіпкерлер сияқты саудадан келген.
Қазір мұнда «Заманауи», «Неоклассика», «Дәстүрлі классика», «Прованс» және «Винтаж» секілді стильдегі жұмсақ жиһаздың 120 түрі шығады. Компания жиһаз өндірісіндегі айналым қаражатын толықтыру үшін жылына 21,75%-бен 2022 жылы «ForteBank»-тен несие алыпты. «Кәсіпкерлікті дамыту жөніндегі 2021-2025 жылдарға арналған ұлттық жоба» мемлекеттік бағдарламасына қатысудың арқасында оның 13,75%-ын «Даму» қоры субсидиялайды.
«BELLA MEBEL» жиһаз фабрикасындағы өнімдер шынында да сапалы екен. Қажетті жиһаздардың кең таңдауы бар. Заманауи үлгіде жасалған. Айтарлықтай қалтаға ауыр емес. Әрине, қымбат түрлерін де алуға болады. Оның өзі шетелдік басқа жиһазбен салыстырғанда әлдеқайда арзанға түсіп тұр. Өз еліміздің өнімінің аты – өз еліміздікі. Осындай отандық өнімдер көбейсе таңдау да көбейеді, бәсекелестік дамиды, тіпті шетелге экспорттауға да мүмкіндіктер ашылады. Мемлекетіміз кәсіп бастайтын әрбір адамға барынша мүмкіндік ұсынып отыр ғой. Тиімді пайдаланып, осындай игі істермен өз брендімізді дамыта бергеніміз жөн. Кәсіпкерлердің қазіргі қадамы қуантады»,- дейді Ақсукент ауылының тұрғыны Шынар Қуандыққызы.
Хуснора Исмайлова да отандық жиһаз фабрикасынан алған жұмсақ диваны көңілінен шыққанын айтып отыр.
«Материалдарының сапасы мен әдемілігі көздің жауын алады. Алғашында өз өніміміз десе тосырқай қарағанымыз рас. Сатушылардың ұсынысын ақылға сала отырып, жұмсақ орындық кейіннен жатын бөлмеге диван алдық. Бәрі де сапалы, жақсы шықты. Қазір ұялмай, сенімді түрде туған-туыстарымызды осы тауарлар сататын сауда үйіне қарай жөн сілтей береміз»,- дейді тұтынушы.
Қазіргі таңда «BELLA MEBEL» жиһаз фабрикасынан шыққан тауарлар тек Түркістан облысы ғана емес республикадағы барлық аудан, қалаларға жөнелтіледі. Арнайы тапсырыс арқылы жасатуға да мүмкіндік қарастырылған.
Фабрика басшылығының айтуынша, алдағы уақытта шетелдік жиһаз фабрикаларымен тәжірибе алмаса отырып жасалатын өнімнің ауқымын кеңейту жоспарланған.
