Батыс Қазақстан облысының Сырым ауданы тасқын салдарынан едәуір шығынға ұшыраған еді. Бүгінде ауданнан түлеп ұшқан студент жастар туған ауылын қайта қалпына келтіруге, зардап шеккен тұрғындар үшін баспана салуға атсалысып жатыр, деп хабарлайды Todayinfo ақпараттық агенттігінің тілшісі.
Қазіргі таңда Жымпиты, Бұлдырты, Өлеңті және Көздіғара ауылдарында баспаналары тасқын судан зардап шеккен адамдарға арналған 114 жаңа үй бой көтеруде.
«Төтенше жағдай жарияланған күннен бастап өңірлік партия филиалының ұжымы және «Ауыл жастары» қанатының 70 — тен астам еріктілері бөгет жұмыстарын жүргізуге, апат салдарын жоюға барынша атсалысты. Партия тарапынан еріктілер құрамы жасақталып, кең көлемде гуманитарлық көмек ұйымдастырылды. Біздің жастарымыздың бастамасымен өңірімізге екі жүк көлігімен 25 тоннадан астам гуманитарлық көмек жеткізіліп, су тасқынынан зардап шеккен тұрғындарға таратылды», — дейді «Ауыл» партиясы жастар қанатының төрағасы Дәурен Рахымбек.
Құрылыс жасағындағы 50 студент жаз бойы қоныстойды жақындатуға үлес қоспақ. Ауылдағы студенттер мен жұмыссыз жастар үшін игілікті жобаны ұсынған – «Ауыл» халықтық-демократиялық патриоттық партиясы.
Бүгін Жымпитыда еңбек сарбаздарын салтанатты қатарға қабылдау шарасы өтті. Жас құрылысшылар салтанатты жиыннан кейін тіке құрылыс нысандарына аттанып, жұмыс күнін бастап та кетті. Студент жастар «Профлайн», «JSGroup», «Қалдығайты» ЖШС мердігер компаниялары арқылы жұмысқа орналасып жатыр.
«Ауыл» партиясының жаңа жобасының Сырым ауданында бастау алғанына қуаныштымыз. Бұл жоба жастарды еңбекке баулып, халықтың мұң-мұқтажын іштен сезініп, Отанға деген сүйіспеншіліктерінің арта түсуіне оңынан әсер етеді деп сенемін. Баспанасыз қалған азаматтар жылы ұяларымен тезірек қауышуына тілектеспіз. Халқымыздың әр азаматы қолынан келгенше осы жолда қызмет етсін!» — деді Батыс Қазақстан облысы Сырым ауданының әкімі Жұмагелді Батырниязов.
Айта кетейік, «Ауыл» партиясының жанындағы жастар қанаты төтенше жағдай уағында халықпен бірге болды.
