Астананың азаматтық істер жөніндегі ауданаралық сотында Валихан Бишімбаев пен Альмира Нұрлыбекованың Қайрат Кемеловке қарсы абырой мен ар-намысты қорғау туралы талап-арызы қаралып жатыр. Бұл туралы Nege.Aqsha порталы хабарлады.
Іс барысы туралы
2025 жылдың қаңтарында AIRAN YouTube арнасында Бишімбаевтың анасы өзінің туысы Бекзат Кемеловаға қарсы қылмыстық іс қозғауға бастамашы болғаны туралы сюжет шыққан болатын. Ақпарат бойынша, Бекзат Кемелова алаяқтық жолмен 1 миллион долларды иемденіп, оны қайтарудан бас тартқан.
Кемелованың жұбайы, сот-медициналық сарапшы Қайрат Кемелов болса, бұл жағдайды Альмира Нұрлыбекованың кек қайтару әрекеті деп санайды. Оның айтуынша, Нұрлыбекова Салтанат Нүкенованың өліміне қатысты сараптама нәтижелеріне ықпал етуге көнбегендері үшін осылай жасаған.
Бишімбаевтардың адвокаты түсіндірме берді
Бишімбаевтардың қорғаушысы Ерлан Ғазымжанов NEGE порталына оқиғаның өз нұсқасын айтып берді:
«Тергеу амалдары кезінде Бекзат Кемелова Бишімбаевтардың үйіне келіп: «Антикорда істейтін жездемнен естідім, туыстарыңыздың үйінде тінту жүргізіледі екен. 30 адамның тізімі бар, біздің атымыз ғана жоқ. Үйдегі қымбат заттар мен ақшаны бізге уақытша сақтауға беріңіздер» деді. Сол кезде БАҚ-та «Барлық ақшаларын тексеру керек!», «Барлығын тәркілеу керек!» деген ақпараттар тараған болатын. Мұндай ақпараттардан соң Альмира Нұрлыбекова күмәнданып, ойланып барып, 1 миллион долларды тапсыруға келісім берген».
Кейін үйде ешқандай тінту жүргізілген жоқ. Куандық Бишімбаевқа үкім шыққан соң, оның анасы ақшасын қайтаруды сұраған, бірақ Бекзат Кемелова қаражатты қайтарудан бас тартқан. Осы жағдай жаңа қылмыстық тергеуге себеп болды, деп атап өтті адвокат.
