Абай облысының Үржар ауданында 34 жастағы жүкті әйел Гүлнәр Қайратқызы босану кезінде көз жұмды. Дәрігерлер нәрестенің де өмірін сақтап қала алмады, деп хабарлайды Тodayinfo ақпараттық порталы.
Марқұмның жұбайы Ұлан Балапановтың айтуынша, әйелінің денсаулығында ешқандай мәселе болмаған. Алайда босанудан кейін бірнеше күн өткен соң, ана мен бала өмірден озған. Ол дәрігерлердің біліксіздігінен жақындарынан айырылғанын мәлімдеді.
Облыстық денсаулық сақтау басқармасы бұл оқиға бойынша қызметтік тексеру жүргізіп, аудандық аурухана бас дәрігеріне қатаң сөгіс жариялағанын хабарлады. Екі орынбасары жұмыстан босатылғанымен, көп ұзамай сол ауруханада қайта тағайындалғаны жұртшылықтың наразылығын тудырды.
31 арна хабарлағандай, қазіргі уақытта полиция босану кезіндегі өлімге қатысты тергеу жүргізіп жатыр. Денсаулық сақтау министрлігі аудандық ауруханаларды тексеріп, өлімнің нақты себебін анықтауға уәде берді.
