Қарағанды облысында ауылдық жерлерде өңір мен елге өте қажетті қызыл кірпіш шығаратын өндіріс пайда болады. Бұл жобаның жүзеге асуы елдің құрылыс индустриясында маңызды рөл атқарады. Зауыттың құрылысы Нұра ауданының Ахмет ауылында басталды. Жобаның басталуына аудан басшылығы, жергілікті тұрғындар мен инвесторлар белсене атсалысты. Жаңа зауыттың құрылуы ауылдағы әлеуметтік-экономикалық жағдайды жақсартуға, сондай-ақ тұрғындардың әл-ауқатын арттыруға бағытталған маңызды бастама болып отыр.
Жобаны іске асыру 80 жаңа жұмыс орнын қамтамасыз етеді. Бұл тек сан емес, әр жұмыс орны – бір отбасының табысы, тұрақты өмір сүру көзі. Ауыл халқы үшін бұл ерекше қуанышты жаңалық болды. Ауыл тұрғындары жаңа жұмыс орындары арқылы өз ауылында тұрақтап, жанұясын асырауға мүмкіндік алады. Сонымен қатар, жастардың қалаға көшу үрдісін баяулатуға да септігін тигізуі мүмкін.
Жоба аудан басшылығы мен жұртшылықтың қатысуымен іске қосылды. Жергілікті халықтың жобаны қолдауы мен әкімдік тарапынан көрсетілген көмектің арқасында құрылыс жұмыстары сәтті басталды. Бұл өз кезегінде мемлекеттік-жекеменшік әріптестіктің нақты үлгісі ретінде қарастыруға болады. Көпшілік жобаның сәтті жүзеге асуына сенім білдіріп отыр.
– Бұл жаңа кәсіпорынның құрылысы ғана емес, ауданның болашағына жасалған маңызды қадам. Бүгінгі таңда ауылдық елді мекендерге инвестиция тарту басым міндеттердің бірі болып табылады. Жергілікті атқарушы органдар мен инвесторлардың бірлескен жұмысы ауылдарды дамытуға жаңа серпін береді, – деп атап өтті Нұра ауданының әкімі Бақытжан Мұқанов. Оның айтуынша, мұндай жобалар ауылдың инфрақұрылымын жақсартуға, тұрғындардың тұрмыс сапасын арттыруға ықпал етеді.
Құны 1,5 млрд теңге болатын жобаны «Бірлік Нұра» ЖШС жүзеге асыруда. Кәсіпорын бұл салада белгілі бір тәжірибеге ие және қазіргі заманғы технологияларды қолдана отырып өндіріс жүргізуді жоспарлап отыр. Зауыттың жобасы халықаралық стандарттарға сәйкес дайындалып, экологиялық қауіпсіздік талаптары да қатаң сақталуда. Жобаның техникалық-экономикалық негіздемесі жан-жақты зерттеліп, ұзақмерзімді даму жоспары да қарастырылған.
