Ақтауда бүгін орын алған әуе апатына байланысты жаңа мәліметтер пайда болды. Ұшақ ішінде болған жағдайды Рустем Адагамов есімді блогер жазды, деп хабарлайды Todayinfo.
Оның сөзінше, ұшақтың сыртқы қаптамасынан зениттік зымыран жарылысы кезінде пайда болатын іздер табылған. Тірі қалған жолаушылардың бірі пилоттардың Грозныйға үш рет қонуға тырысқанын айтып берді.
— Үшінші рет бірдеңе жарылды. Жарылыс болды — бірақ мен оны ұшақтың ішінде болды деп айта алмаймын. Мен отырған жердің қасындағы қаптама ұшып кетті, — дейді Рустем Адагамов.
Бұған дейін ұшақ Грозныйдағы тұманға байланысты Каспий теңізі арқылы Ақтауға бағытталғаны хабарланған болатын. Кейін әуе кемесі құстар тобына соқтығысып, басқарудан айырылған деген болжам жасалды. Алайда, ұшақтың қаптамасындағы іздер басқа жағдайды меңзейді. Ұшақ Грозныйға жақындағанда атып түсірілген болуы мүмкін. Оны украиндық ұшқышсыз ұшу аппараты деп шатастырған болуы ықтимал, себебі дәл сол күні Грозныйға дрондар шабуыл жасаған еді.
Azerbaijan Airlines әуе компаниясына тиесілі Embraer 190 ұшағының бортында барлығы 69 адам, оның ішінде бес экипаж мүшесі болған. Әуе апатынан 28 адамның тірі қалғаны хабарланды.
