Ата заңдағы өзгеріс: Конституция күні 30 тамыз болмауы мүмкін

Қазақстанда 30 тамызда атап өтілетін Конституция күні басқа күнге ауысуы ықтимал. Бұл елдің жаңа Негізгі заңын қабылдау жөніндегі республикалық референдумның қай күні өтетініне тікелей байланысты болады, деп хабарлайды Todayinfo ақпарат агенттігі. Жаңа Конституция жобасында бұл туралы нақты жазылған. Құжатқа сәйкес, жаңа Конституция республикалық референдумда қабылданған күн мемлекеттік мереке – Қазақстан Республикасының Конституциясы күні болып жарияланады. Естеріңізге сала кетейік, 1995 жылдан бері қазақстандықтар Конституция күнін 30 тамызда тойлап келеді. Дәл осы күні жалпыхалықтық дауыс беру арқылы елдің қазіргі Негізгі заңы қабылданған еді. Биыл 30 тамыз жексенбіге сәйкес келеді, сондықтан жаңа референдумды осы күнге белгілеу мүмкіндігі бар. Алайда, егер референдум басқа күні өтсе, онда Қазақстандағы басты мерекелердің бірінің датасы да өзгереді. Жобада көрсетілгендей, республикалық референдумда қабылданған Қазақстан Республикасының Конституциясы референдум нәтижелері ресми жарияланған күннен бастап күшіне енеді. Сол сәттен бастап бұрын қабылданған Қазақстан Республикасы Конституциясының қолданысы тоқтатылады. Сонымен қатар, жаңа Конституция күшіне енген кезде қолданыста болған заңдар мен өзге де нормативтік құқықтық актілер оған қайшы келмейтін бөлігінде қолданыла береді. Фото: Әлеуметтік желіден