8 күнде – 1,8 млрд теңге: "Аңдар шаһары 2" прокатты жарды

Disney студиясының көптен күткен "Аңдар шаһары 2" (Zootopia 2) анимациялық фильмі прокатқа шыққан алғашқы аптада-ақ керемет нәтиже көрсетті. Әсіресе, туындының қазақ тіліндегі нұсқасына деген сұраныс көңіл қуантады. Орталық Азия мен Кавказ елдеріндегі Disney студиясының ресми дистрибьюторы "Ascar Cinema" компаниясы 27 қараша мен 4 желтоқсан аралығындағы ресми кассалық жиын қорытындысын жариялады. 8 күн ішінде мультфильм Орталық Азия мен Кавказ аймағында (Қазақстан, Қырғызстан, Грузия, Армения, Әзербайжан, Өзбекстан және Тәжікстан) 1 миллиард 793 миллион теңгеден астам (3 млн АҚШ долларынан жоғары) қаржы жинады. Бұл аймақта Джуди Хоппс пен Ник Уайлдтың жаңа хикаясын тамашалауға 849 000-нан астам көрермен барған. Қазақша нұсқаның табысы қандай? Ең қызықтысы – мемлекеттік тілдегі көрсеткіштер. "Аңдар шаһары 2" фильмінің қазақ тіліндегі нұсқасы прокаттың алғашқы сегіз күнінде 178 731 330 теңге табыс тапты. Бұл дегеніміз, жалпы кассалық жиынның 15,1%-ы – таза қазақ тіліндегі сеанстардан түскен қаржы. Бұл отандық кино нарығында қазақша контентке деген сұраныстың артқанын және көрерменнің сапалы дубляжды бағалайтынын айқын көрсетеді. Аймақтық рекордтар Фильм тек Қазақстанда ғана емес, көршілес елдерде де үлкен танымалдылыққа ие болып отыр. "Ascar Cinema" ұсынған ресми деректерге сүйенсек, анимациялық лента биылғы жылдың ең табысты жобаларының біріне айналуға мүмкіндігі мол. Қазіргі таңда кинотеатрларда прокат жалғасуда, ал сарапшылар демалыс күндері көрсеткіштер бұдан да жоғарылайтынын болжап отыр.