Қазақстанда жыл сайын өндірістік кәсіпорындарда мыңнан астам жазатайым оқиға тіркеледі, оның шамамен 200-і өліммен аяқталады. Бұл туралы Еңбек министрлігінің деректеріне сілтеме жасап, Orda.kz хабарлады.
Ең көп жарақаттану тау-кен металлургия кешені кәсіпорындарында (жалпы зардап шеккендердің 17–18%-ы) және құрылыс саласында (шамамен 10–12%) тіркелген. Соңғы бес жылда өндірісте зардап шеккендер саны 8,3%-ға азайған.
Қауіпті және зиянды еңбек жағдайында шамамен 500 мың қазақстандық жұмыс істейді. Ауыр дене еңбегімен 100 мыңнан астам адам айналысады. Жыл сайын 650–700 мың жұмысшы зиянды еңбек жағдайы үшін өтемақы алады.
Қазақстанда 2030 жылға дейінгі қауіпсіз еңбек тұжырымдамасы іске асырылуда. Оның мақсаты – еңбек жағдайын жақсарту, жарақаттану мен кәсіби ауруларды азайту. Осы мақсатта еңбекті қорғауды қаржыландыру тәсілдері өзгертіліп, жазатайым оқиғалардан сақтандыру рөлі күшейтіліп, оқыту сапасы арттырылып, қоғамдық бақылау күшейтілуде.
Тұжырымдама аясында Кәсіпорындардың цифрлық картасы және Еңбек тәуекелдерінің цифрлық картасы іске қосылды. Олар өндірістегі тәуекелдерді нақты уақыт режимінде бақылауға және алдын алу шараларын қабылдауға мүмкіндік береді. Сонымен қатар, еңбекті қорғау саласына жасанды интеллект негізіндегі шешімдер енгізілуде, олар кәсіпорындардың жұмысы мен оқиғалары туралы деректерді талдап, жарақаттардың себептерін анықтауға және олардың алдын алуға көмектеседі.
