Әлия Назарбаева Мәскеуге қоныс аударуды жоспарлап отыр

Қазақстанның тұңғыш президенті Нұрсұлтан Назарбаевтың кенже қызы Әлия Назарбаева Мәскеуге қоныс аударуды жоспарлап отыр. Бұл туралы Todayinfo ақпарат агенттігі хабарлайды. Ulysmedia.kz порталының мәліметінше, Әлия Назарбаева Ресейде ірі бизнеске ие және енді сол жерде тұрақты тұр

Әлия Назарбаева кім?

Әлия Назарбаева – Нұрсұлтан Назарбаевтың кенже қызы. Ол экология саласында бизнес жүргізіп, қоғамдық жұмыстармен айналысқан. Қазақстанның экологиялық ұйымдар қауымдастығын басқарды және қалдықтарды өңдеу мен утилизациялаумен айналысатын бірнеше компанияларды бақылауда ұстады. Сонымен қатар, AYA зергерлік брендінің иесі болып, бірнеше девелоперлік жобаларға қатысқан. Ол "Күш-қайрат мекені" атты кітабында өзінің өмірі, рухани ізденістері және әкесімен қарым-қатынасы туралы баяндаған.

"Оператор РОП" ісімен байланысы

2022 жылғы қаңтар оқиғаларынан кейін "Оператор РОП" компаниясы таратылды. Бұл компания автокөліктер мен басқа да техникаларға утилизациялық алым жинаумен айналысып, миллиардтаған табыс әкелген. Әртүрлі зерттеулерге сәйкес, бұл құрылым Әлия Назарбаевамен байланысты болған. Қаңтар оқиғаларынан кейін оның үй қызметкері Шнар Мұқтарова тергеуге алынды. Алайда, Әлия Назарбаева бұл істе ресми түрде фигурант ретінде танылмады және жауапқа тартылмады.

Жеке өмірі

БАҚ мәліметтері бойынша, Әлия Назарбаева үш рет тұрмыс құрған. 1998 жылы 18 жасында Қырғызстанның бұрынғы президенті Асқар Ақаевтың үлкен ұлы Айдар Ақаевқа тұрмысқа шықты. Бұл неке үш жылға созылды. 2002 жылы бизнесмен Данияр Хасеновпен некелесті. 2015 жылы Димаш Досановқа тұрмысқа шықты, алайда бұл неке де ажырасумен аяқталды. Бұрынғы президенттің қызында төрт бала бар.

Қаңтар оқиғаларынан кейінгі өмірі

2022 жылғы қаңтар оқиғаларынан кейін Назарбаевтар отбасы көпшілік назарынан тыс қалды. Әлия Назарбаева отбасымен бірге БАӘ-ге кетіп, сол жерде ұзақ уақыт болғаны хабарланды. Енді, Ulysmedia.kz мәліметінше, ол Мәскеуге қоныс аударуды шешкен. Бұл оның бизнес мүдделерімен және қауіпсіздік мәселелерімен байланысты болуы мүмкін. 14 желтоқсанда Ресей президенті Владимир Путин Ново-Огареводағы резиденциясында Нұрсұлтан Назарбаевпен кездесіп, онда Әлия Назарбаеваның көшуі және қауіпсіздік мәселелері талқыланғаны айтылды.