"Ұлттық қауіпсіздік комитеті анықтауы қажет": Айгүл Орынбек Назарбаев Путин кездесуі туралы шындықты айтты

Зеңгер Айгүл Орынбек әлеуметтік желіде ел ішіндегі тұрақтылық пен қауіпсіздікке қатысты алаңдаушылық білдірді. Ол қаңтар айының дәл алдында ұйымдастырылып жатқан саяси кездесулердің уақыты да, салмағы да қоғамды бейжай қалдырмайтынын айтты. Бұл туралы Todayinfo порталы хабарлайды. Айгүл Орынбектің сөзінше, бұрын 16 желтоқсан жақындағанда үрей күшейетін, ал қазір қанды Қаңтардың қайталануынан қауіптенетін кезеңге жеттік. Ол зейнетке кеткен атасының «өз халқының бейбіт өмірі үшін тыныш жатқанын қалайтынын» айтып, елдің тыныштығына қатер төндірмеу керек екенін меңзеді.

«Кім қайта-қайта жіберіп жүр?» деген сұрақ

Зеңгердің пікірінше, белгілі бір тұлғаның Владимир Путинге қайта-қайта баруының астарында не тұрғанын Ұлттық қауіпсіздік комитеті анықтауы қажет. Әсіресе дәл қаңтар айының алдында өтетін мұндай кездесулердің пиғылы күмән туғызатынын атап өтті. Ол егер осы кездесулерден кейін ел ішінде тағы бір көтеріліс немесе тұрақсыздық орын алса, халық нақты себепкері кім болғанын білуге тиіс деді. «Күнделікті тіршілікпен жүрген, саясаттың ішкі астарын терең біле бермейтін қарапайым жұрт көп нәрсені бірден аңғармауы мүмкін» деген ой айтты.

Арандатуға ермей, бірлікті сақтау үндеуі

Айгүл Орынбек елде «неге түбегейлі өзгеріс болмай жатыр?» деген сұрақтың жауабын іштен кедергі жасап отырғандардың аз еместігімен байланыстырды. Сондықтан халықты әлеуметтік желідегі күмәнді үндеулер мен арандатушы ұрандарға ермеуге шақырды. Оның айтуынша, тәуелсіздікті сақтау — жеңіл міндет емес, әр азаматтан саналы ұстаным талап етеді. «Маңғаз Маңғыстауым, Шырайлы Оңтүстігім, Сабырлы Солтүстігім, Шыдамды Шығысым — бөлінбейік, арандатуға ермейік!» деген үндеу тастады. Автор пікірін «Бірлік бар жерде ғана тұрақтылық бар. Ал тұрақтылық — тәуелсіздіктің тірегі» деп түйіндеді.