Алматы облысының әкімі Марат Сұлтанғазиев «Таза Қазақстан» экологиялық акциясы аясында коммуналдық қызметкерлермен кездесті, деп хабарлайды Todayinfo ақпарат агенттігі.
Қонаев қаласындағы жағажайда өткен шарада әкім жұмысшылармен бірге қоқыс жинап, кейін таңғы ас үстінде әңгімелесті. Коммуналдық қызметкерлер өз мәселелері мен ұсыныстарын ашық жеткізді.
Әкім еңбек адамдарының жұмыс жағдайы мен тұрғындардың тазалық мәдениеті туралы пікірлерін тыңдады. Кездесу барысында өңірдің дамуы, көше тазалығы, отбасы және бала тәрбиесі сияқты тақырыптар да қозғалды.
«Өңірдің таза әрі жайлы болуы – сіздердің күн сайын атқарып жүрген жауапты қызметтеріңіздің нәтижесі. “Таза Қазақстан” тұжырымдамасы еліміздің Конституциясында белгіленген негізгі қағидаттардың бірі. Қоршаған ортаны, туған жерімізді таза ұстау баршамыздың міндетіміз. Осы мақсатта атқарып жүрген еңбектеріңіз үшін Сіздерге шынайы алғысымды білдіремін», – деді облыс әкімі.
Шара соңында коммуналдық қызметкерлерге естелік сыйлықтар табысталып, әкім алғыс айтты. Алматы облысында әр апта сайын «Таза бейсенбі» акциясы өткізіліп, оған тұрғындар, бизнес өкілдері және мемлекеттік мекеме қызметкерлері қатысады. Мұндай кездесулер еңбек адамдарының мәртебесін арттыруға және билік пен халық арасындағы диалогты нығайтуға бағытталған.
