Алматыдағы құрылыс компаниясы «Etude-Ybyrai» ЖШС журналист Вадим Борейконы жалған ақпарат таратып, іскерлік беделіне нұқсан келтірді деп айыптап, одан 71 миллион теңге өндіруді талап етіп отыр. Борейконың барлық банктік шоттары, оның ішінде зейнетақы картасы да бұғатталды.
Журналист шоттардың бұғатталғанын 27 сәуірде кездейсоқ байқаған. Ол банк қосымшаларына кіріп, барлық карталары мен депозиттеріне шектеу қойылғанын көрген. Кейін оған сот орындаушысының аты-жөні көрсетілген SMS келген. Сот орындаушысы журналистке қарсы құрылыс компаниясы азаматтық талап қойғанын хабарлаған. Бостандық аудандық сотының хабарламасы бойынша, сот отырысы 19 мамырға белгіленген.
Талап қоюшы – «Etude-Ybyrai» ЖШС-нің сенімді өкілі Бахыт Қасыбаев. Бұл компания Алматының 12-шағынауданында Premier тұрғын үй кешенін салып жатыр. Талап арызында: «Жауапкер бұқаралық ақпарат құралдарында іскерлік беделге нұқсан келтіретін және елеулі мүліктік шығынға әкеп соққан көрінеу жалған мәліметтерді жүйелі түрде таратты» делінген.
Борейконың айтуынша, ол өзінің «Гиперборей» YouTube каналында Premier тұрғын үй кешенінің құрылысы туралы жеті рет сюжет көрсеткен. Алғашында ол 12-шағынаудан тұрғындарының құрылысқа наразылығын көрсеткен. Тұрғындар бастапқыда құрылыс салушыны «Everest Development» ЖШС деп атаған, себебі пәтер сату жарнамалары дәл осы компанияның сайтында орналастырылған. Алайда «Etude-Ybyrai» ЖШС 2025 жылдың қаңтарына дейін «Everest-Ybyrai» деп аталған, кейін қайта тіркелген.
6 қаңтарда журналист Мәжіліс депутаты Бақытжан Базарбекпен бірге 12-шағынауданға барған. Депутат Алматы қалалық ведомстволары мен құрылыс салушы өкілдерін кездесуге шақырған. Тараптардың ұстанымдары әртүрлі болды. Шенеуніктер жобалық құжаттама сараптамасының қорытындысы жойылғанын және құрылыс жұмыстарын бастау туралы хабарлама тізілімнен алынып тасталғанын мәлімдеген. Құрылыс салушы бұл ақпараттың ескіргенін, сараптама қайтадан өткенін және құрылысқа кедергі жоқ екенін айтқан.
«Репортаж барысында мен өз пікірімді білдірмедім, барлық спикерге микрофон ұсындым. Кездесу соңында каналда сөз сөйлеуге ниет білдірушілерді шақырдым», – деді Борейко.
Сол рейдтен кейін құрылыс қысқа уақытқа тоқтатылып, кейін қайта жанданды. Қаңтар айының соңында эфирге «Etude-Ybyrai» ЖШС заң бөлімінің бастығы Бахыт Қасыбаев шығып, компанияда барлық рұқсат құжаттары бар екенін қайталаған. Енді құрылыс салушы Борейконың жарияланымдары құрылыста тоқтап қалуға және пәтер сатылымының төмендеуіне әкелді деп мәлімдеп отыр.
Бұған дейін 2025 жылдың қарашасында Борейконың Instagram-дағы барлық жарияланымдары жойылған еді. Осыған ұқсас жағдай белсенді Санжар Бокаев пен журналист Асхат Ниязовтың аккаунттарында да болған. Борейконың айтуынша, бұған дейін де әлеуметтік желілер оның ескі жазбаларын «жалған ереже бұзушылықтарды» сылтауратып жойған.
