Алматы әкімдігі Медеу ауданындағы төрт жер телімін мәжбүрлеп алу процесін бастады, деп хабарлайды Todayinfo ақпарат агенттігі.
Жерді тау кластерін құру және канат жолдарының базалық станцияларын салу үшін алу жоспарлануда. Құжатқа сәйкес, жер телімдерін 2027 жылдың 31 желтоқсанына дейін алу жоспарланған. Тиісті қаулыға 27 сәуірде Алматы әкімі Дархан Сатыбалды қол қойды.
Қаулыда: «Алматы тау кластерін қалыптастыру, канат жолдарының базалық станцияларын салу үшін Алматы қаласы Медеу ауданы Алма-тау көшесінде орналасқан төрт жер телімін немесе өзге де жылжымайтын мүлікті мемлекет мұқтажы үшін алуға байланысты мәжбүрлеп иеліктен шығаруды бастау» делінген.
Меншік иелеріне өтемақы төлеу жер қатынастары басқармасында жүргізіледі. Барлық рәсімдер аяқталғаннан кейін жер телімдері қалалық туризм басқармасының балансына беріледі. Бұған дейін мемлекет Алматы тауларындағы жеке меншік иесінен құны екі миллиард теңге болатын жер телімін алып қойған болатын.
