Алматыда екі күн бұрын із-түзсіз жоғалып кеткен 76 жастағы зейнеткердің денесі табылды. Өкінішке қарай, қарияны аман алып қалу мүмкін болмады. Бұл туралы қаладағы іздеу тобының еріктілері хабарлады.
Қайғылы оқиғаның нүктесі бүгін қойылды. Волонтерлер марқұмның денесі нақты қай жерден және қандай жағдайда табылғаны жөнінде ашық ақпарат берген жоқ. Тек іздеу жұмыстарының тоқтатылғанын растады.
Еске сала кетейік, 1949 жылы туған Сабит Куаев 2 желтоқсан күні таңғы сағат 10:00 шамасында үйінен шығып кетіп, қайта оралмаған болатын.
Ерекше белгілері мен киімі
Туыстары мен еріктілер дабыл қағып, қарияны қаланың барлық аумағынан іздестірген еді. Ақсақалдың үстінде ескілеу ақшыл-сары тон (полушубок) және аяғында ақ туфли болған. Қолында киім салынған пакеті бар екені де айтылған.
Бойы 160-165 сантиметр, дене бітімі арықша келген қарияның шашы қысқа, қоңыр көзді болатын.
Денсаулығында кінәрат болған
Бұл оқиғаның қайғылы аяқталуына зейнеткердің денсаулығы тікелей әсер еткен болуы мүмкін. Туыстарының айтуынша, қария бұған дейін инсульт алған.
"Ол кеңістікте бағдарлай алмайтын (дезориентация) күйде болған. Инсульт салдарынан оң қолы жансызданып, сал болып қалған", – деп жазылған еді іздеу парақшаларында.
Қазіргі уақытта құқық қорғау органдары оқиғаның мән-жайын анықтап жатыр. Сараптама тағайындалуы мүмкін.
