Алматыда Қазақстанның Халық жазушысы, Еңбек Ері, ақын, мемлекет және қоғам қайраткері Олжас Сүлейменовтің 90 жасқа толуына арналған салтанатты кеш өтті, деп хабарлайды Todayinfo ақпарат агенттігі.
Абай атындағы опера және балет театрының сахнасында өткен бұл іс-шара зиялы қауым өкілдерін, мемлекет және қоғам қайраткерлерін, ақын-жазушылар мен өнер майталмандарын біріктірді.
Кеш ақынның жүрекке әсерлі өлеңдерін оқумен басталды. Сонымен қатар, көрермендерге Олжас Сүлейменовтің өз дауысымен оқылған архивтік бейнежазбасы ұсынылды.
Мерейтой иесіне Қазақстаннан және шетелдік мемлекет, қоғам қайраткерлерінен, мәдениет пен әдебиет өкілдерінен арнайы құттықтаулар жолданды. Ақынның ел руханиятына сіңірген елеулі еңбегі кеңінен аталып өтті.
Салтанатты кеште танымал өнер жұлдыздары ән шырқап, ақындар арнау өлеңдерін оқыды. Олжас Сүлейменовтің шығармашылығы, азаматтық ұстанымы мен қоғамдық қызметі кеңінен дәріптелді.
Бүгін Алматы қаласының әкімі Дархан Сатыбалды Мемлекет басшысы атынан Олжас Сүлейменовке құттықтау хат табыстады.
Олжас Сүлейменов – қазақ әдебиеті мен мәдениетінің дамуына өлшеусіз үлес қосқан көрнекті тұлға. Оның шығармалары ұлттық руханияттың алтын қорына еніп, бірнеше буын оқырманның рухани тәрбиесіне ықпал етті. Ақынның қоғамдық және халықаралық деңгейдегі қызметі де ел тарихында айрықша орын алады.
