Алматыда мүгедек қартты туған ұлының соққыға жыққаны бейнежазбаға түсіп, әлеуметтік желілерде тарады. Оқиға Райымбек даңғылы мен Розыбакиев көшесінің қиылысында орын алғаны хабарланды,деп хабарлайды Todayinfo.
Желі қолданушылары мен куәгерлердің айтуынша, ер адам өз әкесін бірнеше рет ұрып, балағат сөздер айтқан. Қасында жүрген адамдардың ескертуіне қарамастан, әрекетін тоқтатпаған. Бұл жағдай көпшіліктің ашуын туғызып, қоғамдық наразылыққа себеп болды.
Қала тұрғындары – әділдік талап етуде
Оқиғаға куә болған азаматтар мен бейжай қарамаған әлеуметтік желі қолданушылары Алматы қалалық полиция департаментінен шұғыл әрекет етуді талап етуде.
«Қоғам алдында адамгершілік пен заңға қайшы әрекет жасағандарға кешірім болмауы керек. Мүгедек қарияға қол көтеру — бұл тек тұрмыстық зорлық емес, ар-ожданға тікелей шабуыл», — деп жазды желідегі пікірлердің бірі.
Полициядан ресми жауап күтілуде
Әзірге құқық қорғау органдары тарапынан ресми мәлімдеме берілген жоқ. Қоғам белсенділері мен тұрғындар бұл іске құқықтық баға беріліп, кінәлі азаматқа тиісті жаза қолданылуын сұрап отыр.
Қарттарға қатысты зорлық — қоғамның дерті
Сарапшылардың айтуынша, қарт адамдарға жасалатын тұрмыстық зорлық-зомбылық — еліміздегі өзекті әлеуметтік мәселелердің бірі. Мұндай істер бойынша қылмыстық және әкімшілік жауапкершілік көзделеді.
