Ақтаудағы ұшақ апатынан аман қалған бортсерік жұмысына оралды

Фото: media.az Ақтау маңындағы AZAL ұшағының апатынан аман қалған бортсерік Айдан Рагимли араға бір жыл салып өз жұмысына қайта оралды, деп хабарлайды Todayinfo.kz ақпарат порталы жергілікті БАҚ-қасілтеме жасап. AZAL әуе компаниясының әлеуметтік желідегі ресми аккаунтында тиісті ақпарат пайда болды.

«Кейде сөздер арқылы бәрін жеткізу мүмкін емес, бірақ өмір жалғасып жатыр. J2-8243 Баку-Грозный рейсі Айдан Рагимлидің есінде жатталып қалатын сәт болды. Бүгінде ол бастан өткергенін санасында сақтап, өмірдің жалғасатынын түсініп отыр. Ол өз жұмысын кәсібилікпен әрі жауапкершілікпен атқарады», – деп жазылған бейнероликте.

Апат кезінде аман қалған бортсерік Айдан Рагимли Әзербайжанның ең жоғары мемлекеттік наградасының бірі  – бірінші дәрежелі «Рашадат» орденімен марапатталған болатын. Өткен жылдың 25 желтоқсанында Ақтау маңында AZAL компаниясының Бакудан Грозныйға ұшып шыққан рейсі апатқа ұшырады. Әуе бортында 67 адам болған, оның ішінде бесеуі – экипаж мүшесі. Қайғылы оқиға салдарынан 38 жолаушы қаза тауып, 29 адам аман қалды. Айта кету керек, бұған дейін Ақтау маңында AZAL ұшағы апатынан қаза тапқандарға ескерткіш қойылғанын жазғанбыз.