Ақтөбеде автокөлікке техникалық жөндеу орталығын (ТЖО) және көлік жуу бекетін салу үшін сквердегі ағаштардың жаппай кесілуі үлкен дауға ұласты. Жергілікті тұрғындар наразы: жасыл аймақ осыдан 15 жыл бұрын пайда болған, ал көптеген ағаштарды олар өз қолдарымен отырғызған.
Уақыт өте келе бұл сквер шын мәнінде демалыс орнына айналды — орындықтар, жаяу жүргіншілер жолдары, сая болар ағаштар. Мұның бәрін тұрғындар ешкімнің көмегінсіз жасап, күтіп ұстаған.
Алайда мереке күндері бұл жерге ауыр техника кенеттен кіріп келді. Белгілі болғандай, мұнда ТЖО салу жоспарланған. Бұл туралы КТК телеарнасы хабарлады.
— Біз қарсымыз! Бұл сквер бізге керек, ол — өміріміздің бір бөлігі. Балалар ойнап, қарттар демалатын орын болуы тиіс. Ал олар бар болғаны бірнеше сағаттың ішінде 30-дан астам ағашты қиратты! — дейді жергілікті тұрғын Валентина Казаченко.
Қоғамдық наразылықтан кейін белгілі болды: құрылыс жүргізіп жатқан кәсіпкерге тек бес ағашты басқа жерге көшіруге рұқсат берілген екен. Қалғаны — заңсыз.
Бұл жағдай қала тұрғындарының ашуын туғызып, олар жұмыстарды тоқтатып, жасыл аймақты сақтап қалуды талап етуде.
