Қазақстанда ArtSport бағдарламасы арқылы балалардың спорт және шығармашылық үйірмелеріне төленетін қаражатты «Әлеуметтік әмиян» сервисі арқылы аудару жоспарланып отыр, деп хабарлайды Todayinfo ақпарат агенттігі.
Мәселені цифрлық даму саласына жауапты орган көтерді. Ведомство ArtSport аясындағы төлемдер жаңа сервиске көшсе, бюджет қаржысының қалай жұмсалғанын нақты қадағалау жеңілдейді деп күтеді. Негізгі мақсат — қаражат бөлуде де, төлем жасауда да ашықтықты күшейту.
Бірінші вице-министр Ростислав Коняшкиннің айтуынша, «Әлеуметтік әмиян» қазірдің өзінде бірнеше әлеуметтік қызметті біріктіріп отыр. Ата-аналар бұл жүйе арқылы мектептегі тамақтану, дәрі-дәрмек және әлеуметтік қолдаудың бірқатар түрін рәсімдей алады.
«Спорттық және шығармашылық үйірмелер мен секцияларға төлемді ArtSport бағдарламасы бойынша «Әлеуметтік әмиян» сервисіне көшіруді жоспарлап отырмыз. Бұл шешім бюджет қаржысының жұмсалуын бақылауды және ашықтықты арттыруға бағытталған», — деді Ростислав Коняшкин.
Жоспар бойынша 2026 жылы сервис мүмкіндігі кеңейеді. Мемлекеттік органдар «Әлеуметтік әмиянға» тағы 10 бағытты қосуды көздеп отыр, олардың ішінде қосымша білім беру мен мектепке дейінгі тәрбие мен оқыту да бар.
Жаңа тәсіл үйірмеге баланың нақты қатысуын белгілеп отыруға мүмкіндік бермек. Соның негізінде жүйе есеп-қисапты автоматты түрде құрастырып, бюджеттен төленетін соманы нақты дерекке сүйеніп жүргізеді. Осылайша, қаржы тек көрсетілген қызмет үшін аударылуы тиіс.
Фото: Әлеуметтік желіден
