Атырауда сталкинг бойынша Қазақстандағы алғашқы қылмыстық іс үкіммен аяқталды

Атырау облысында сталкинг бойынша Қазақстан тарихындағы алғашқы қылмыстық іс айыптау үкімімен аяқталды. Курманғазы ауданында болған бұл оқиға ауыл тұрғындарын біраз уақыт әбігерге салған. Бұл туралы Todayinfo порталы хабарлайды. Бәрі түнгі «үнсіз келіп-кетулерден» басталған. Ер адам қоршаудан асып өтіп, үйлердің терезесіне жақындап, жыныстық сипаттағы ерсі әрекеттер жасаған да, ешкім байқамайтындай ізін суытып кетіп отырған. Алғашында мұның бәрі «бұзақылық» ретінде ғана бағалануы мүмкін еді. Бірақ жәбірленушілердің бірі көше камерасындағы видеоны ұсынып, түнгі келушінің терезе алдында жартылай шешініп тұрған сәті анық көрінген. Кейін белгілі болғандай, бұл бір реттік оқиға емес. Бірнеше ауыл тұрғыны бір адамды қайта-қайта терезе сыртынан көргенін айтқан. Ең жиі қудалауға ұшыраған әйел полицияға ресми түрде арыз түсірген.

2ГИС арқылы бала геолокациясын бақылағаны анықталды

Сот процесі кезінде тағы бір маңызды жайт ашылды: ер адам 2ГИС қосымшасын пайдаланып, жәбірленушінің кәмелетке толмаған ұлының геолокациясына қол жеткізген. Осылайша әйелдің әртүрлі жерде жүргенін байқап, қайтадан соңынан түскен. Физикалық күш қолдану немесе тікелей байланыс болмағанымен, әрекеттердің жүйелі түрде қайталануы бұл жағдайды кездейсоқтықтан гөрі тұрақты қудалау екенін көрсетті.

Жаңа бап бойынша жауапқа тартылды

Сот үкімінде эпизодтарды жеке-жеке бөліп қарастырмаған. Барлығы бір қылмыстық әрекет ретінде — адамның еркіне қарсы заңсыз қудалау деп танылып, Қылмыстық кодекстің жаңа 115-1-бабымен сараланған. Курманғазы аудандық соты ер адамды кінәлі деп танып, 200 сағат қоғамдық жұмысқа кесті. Сонымен бірге ол жәбірленушіге моральдық зиян үшін 400 000 теңге өтемақы және 200 000 теңге сот шығынын төлеуге міндеттелді. Үкім әзірге заңды күшіне енген жоқ.