Қостанай облысында сот II топтағы мүгедек анасына ай сайынғы алимент төлеуді бекітті. Қыз анасына көмектесуден бас тартып, оның бұрын алкогольді асыра пайдаланғанын және ата-ана міндеттерін орындамағанын айтты, деп хабарлайды Todayinfo ақпарат агенттігі.
Іс материалдарына сәйкес, талапкер емделуге, азық-түлікке және коммуналдық қызметтерге ақы төлеу үшін материалдық қолдау қажет екенін айтты. Мүгедектік бойынша жәрдемақы шығындарды жаппаған. Жауапкер талаппен келіспеді. Қыз анасын ата-ана міндеттерін орындамады және алкогольді асыра пайдаланды деп айыптады, соның салдарынан оны туыстары тәрбиелеген.
Алайда судья ҚР «Неке (ерлі-зайыптылық) және отбасы туралы» кодексінің 145-бабына сілтеме жасады. Бұл бап кәмелетке толған еңбекке қабілетті балаларды еңбекке жарамсыз ата-аналарын асырауға міндеттейді.
«Сот талапкердің медициналық құжаттармен расталған ауыр ауруларын, оның бөгде көмекке мұқтаждығын, сондай-ақ жәрдемақының аз мөлшерін ескерді. Сонымен қатар жауапкердің табысы мен жасы да ескерілді», — делінген сот хабарламасында.
Бастапқыда әйел 40 АЕК (147 мың теңге) талап еткен, бірақ сот талапты ішінара қанағаттандырып, жауапкерге ай сайын 4 АЕК (15,7 мың теңге) төлеуді міндеттеді. Шешім заңды күшіне енді.
