Танымал саясаттанушы Данияр Әшімбаев Конституциялық комиссияның жұмысын сынап, ұсынылған өзгерістерде үкіметті қалыптастыру қағидаттары мен билік тармақтары арасындағы тепе-теңдікке қатысты көптеген олқылық бар екенін мәлімдеді, деп хабарлайды Todayinfo ақпарат агенттігі.
Сарапшының айтуынша, комиссия отырыстарында үкіметті құру тетіктері мүлде талқыланбаған. Тек президент ұсынған премьер-министрдің кандидатурасын Құрылтай екі рет қабылдамаса, таратылуы мүмкін екені ғана айтылған.
"Бір палаталы, партиялық тізіммен сайланатын парламент моделіне көшу партиялардың үкіметті жасақтауға ықпалын арттырмаған. Бұрын Сенаттың құзырында болған Жоғарғы сот, Конституциялық сот, Ұлттық банк, ҰҚК төрағаларын және Бас прокурорды тағайындауға келісім беру сияқты функциялардың енді Құрылтайға өтетіні де нақтыланбаған", - деп жазды Әшімбаев.
Ол кадрлық мәселелер бойынша барлық бастама президентке өтіп, парламенттің рөлі тек келісім беру немесе қабылдамау деңгейіне түсіп қалатынын атап өтті.
Сонымен қатар, саясаттанушы үкімет құрамына кірмейтін орталық мемлекеттік органдарға қатысты құқықтық қайшылықтарға назар аударды. Оның сөзінше, жаңадан құрылып жатқан Алатау қаласының әкімшілігін "үкімет құрамына кірмейтін орталық мемлекеттік орган" деп атау – қазіргі конституцияға қайшы келеді.
Сөзінің соңында Данияр Әшімбаев президенттік мерзімді шектеу мәселесіне тоқталды. Ол мұндай шектеудің тұрақсыздандырушы факторға айналуы мүмкін екенін ескертті.
"Кез келген президент жаңа мерзімге баруды жоспарламауы мүмкін, бірақ оның сондай мүмкіндігі болуы керек. Олай болмаған жағдайда, бұл мемлекеттік аппаратты тұрақсыздандырып, халықты дүрліктіреді", - деп түйіндеді сарапшы.
Фото: Әлеуметтік желіден
