Қазақстанның Денсаулық сақтау министрлігіне сілтеме жасаған Астаналық медицина ғылымдарының докторы, жоғары санатты инфекционист-дәрігер Динагүл Баешева екпеге қатысты кең тараған қате түсініктердің бірін жоққа шығарды, деп хабарлайды Todayinfo ақпарат агенттігі.
Дәрігердің айтуынша, көптеген ата-ана балалардағы аутизмді екпелермен байланыстырады, себебі белгілері екпе салынғаннан кейін пайда болуы мүмкін.
«Ғылымның нақты жауабы бар: екпелер аутизм тудырмайды. Бұл миллиондаған балалар қатысқан ауқымды зерттеулермен расталған. Неліктен шатасу туындайды? Аутизмнің алғашқы белгілері көбінесе 1,5-2 жаста – дәл қайталама екпе кезеңінде байқалады. Бірақ бұл тек уақыттың сәйкестігі. Түсіну маңызды: сәйкестік себеп-салдарлық байланысты білдірмейді», — деп түсіндірді Астана медицина университетінің балалар инфекциялық аурулары кафедрасының меңгерушісі Динагүл Баешева.
Медицина ғылымдарының докторы аутизмнің туылғанға дейін қалыптасатынын және мидың даму ерекшеліктері мен генетикалық факторларға байланысты екенін еске салды. Екпелер бұл процестерге әсер етпейді – олар баланы қауіпті инфекциялардан қорғайды.
«Дәрігерлер күн сайын қызылша, көкжөтел және алдын алуға болатын басқа да аурулардың ауыр зардаптарымен бетпе-бет келеді. Кейде көмек кеш көрсетіледі. Екпе салу – бұл қауіп емес, қорғаныс», — деп атап өтті инфекционист-дәрігер.
Екпе салу мен аутизм арасындағы байланыс туралы қате түсінік 1998 жылы The Lancet журналында мақала жарияланғаннан кейін пайда болды. Кейінірек ондағы деректер бұрмаланғаны, мақала кері қайтарып алынғаны, ал авторы медициналық лицензиясынан айырылғаны анықталды.
ДДСҰ (Дүниежүзілік денсаулық сақтау ұйымы) бұған дейін де екпелер аутизм тудырмайтынын және адам өмірін сақтап қалатынын, ал мұндай мәлімдемелердің ғылыми негізі жоқ екенін айтқан болатын.
Өткен жылдың қыркүйек айында Алматылық блогер аутизммен ауыратын балаларды өлтіруге шақырған еді, себебі олардың сезімдері жоқ деп мәлімдеген. Полиция қылмыстық іс қозғап, шара қолдануға уәде берді.
