Ақтөбеде Елек өзенінен өлі табылған 10-сынып оқушысы мен 27 жастағы жігіттің өліміне қатысты жаңа және қорқынышты мән-жайлар ашылуда. Марқұмдардың туыстары бұл жай ғана жазатайым оқиға емес екеніне сенімді. Олардың пайымдауынша, оқиға орнында үшінші адам болуы мүмкін. Бұл туралы Todayinfo порталы Tengrinews сайтына сілтеме жасап хабарлайды.
Еске салайық, 2 желтоқсанда құтқарушылар екі күн бойы іздестірілген 16 жастағы Ислам Төреғали мен 27 жастағы Сырлыбай Саматтың денесін тапқан болатын. Бұрын бір-бірін мүлде танымаған бұл екі адамның бір түнде, бір жерден өлі табылуы көптеген сұрақ туғызды.
"Ұлымды темірмен ұрғандай..."
Қайғыдан қан жұтқан Исламның анасы Айгүл Кереева ұлының денесін көргенде төбе шашы тік тұрғанын айтады. Мәйітханадан денені жабық пакетпен беріп, ашпауды бұйырғанына қарамастан, отбасы үйге келген соң орауды ашып қараған.
«Исламның денесінде сау жер жоқ еді. Темірмен ұрғандай, мұрны сынған, бүкіл денесі көк ала қойдай болған. Ұлым өздігінен суға батып кетуі мүмкін емес. Оны өлтірген. 16 жастағы бала кімге кедергі болды екен? Оның жанында біз ешқашан көрмеген ересек адам қалай тап болды?» - дейді анасы.
Исламды Құлсары қаласына жерлеп келген отбасы қазір сот-медициналық сараптаманың қорытындысын күтіп отыр. Айгүл сол түні жаман түйсік болғанын, түнгі үште ұлының үйде жоғын байқап, бірден іздеуге кіріскенін еске алады.
Бейтаныс екеу және үшінші адам
Тағы бір жұмбақ жайт – марқұмдардың бір-бірін танымауы. Алдын ала мәлімет бойынша, Исламды моншадағы жұмысынан кейін Сырлыбай Самат алып кеткен.
Екінші марқұмның әкесі Самат Қәлиев те түсініксіз жағдайда қалды. Оның айтуынша, ұлының денесінде зорлық-зомбылық белгілері болмаған.
«Балам бізбен бірге кешкі асын ішіп кеткен еді. Ересек адам ғой деп уайымдамадық. Кейін оны өзеннен тапқанын хабарлады. Оны жасөспірім баламен не байланыстыруы мүмкін? Олар құрдас емес, қызығушылықтары да әртүрлі. Олардың қалай бірге болғанын түсіне алар емеспіз», - дейді Сырлыбайдың әкесі.
Үміт – бейнекамерада
Сырлыбайдың көлігі Елек өзенінің жағасындағы бос жерден табылған. Екеуінің де ұялы телефондары көлік ішінде қалған. Қазір тергеушілер олардың соңғы қоңыраулары мен хат-хабарларын жіті тексеріп жатыр.
Алайда туыстарының бар үміті – көлік тұрған жерге дәл бағытталған бейнебақылау камерасында.
«Бұл камера бәрін түсіріп алуы керек еді. Әрбір қимыл көрінуі тиіс. Бірақ тергеу жүріп жатыр деген сылтаумен бізге жазбаларды көрсетпей отыр. Бар үмітіміз сонда. Мүмкін, сол түні шын мәнінде не болғанын сол камера айтып берер», - дейді Исламның әпкесі Нұрханым.
Полиция әзірге бұл жағдайға қатысты ресми түсініктеме берген жоқ. Іс өлім себебі анықталмаған жағдайда қозғалатын бап бойынша тергелуде.
