Бас прокуратураға ресми арыз түсті. Мәжіліс депутаттары Бақытжан Базарбек пен Мұрат Әбенов еліміздің негізгі дәрі-дәрмек жеткізушісі – «СК-Фармация» компаниясына қатысты қылмыстық іс қозғауды сұрап, тексеріс жүргізуді талап етті.
Бұл бастама Жоғарғы аудиторлық палатаның салалық мониторинг нәтижелері бойынша туындаған. Палата медицина саласындағы жүйелі қаржылық заңбұзушылықтарды әшкерелеген.
Келтірілген деректер — шошырлық
-
Дәрілер бірнеше есе қымбатқа сатып алынған. Кейбір жағдайларда бағалар 3,5 есе артық көрсетілген.
-
Мысалы, «КазМедПром» деген компания Таиландтан 4 миллиард теңгеге сатып алған медициналық қолғаптарды қазақстандық ауруханаларға 8 миллиардқа өткізген.
-
Шамамен 17 миллиард теңгеге сатып алынған дәрілер еш қажет болмағандықтан – жойылған. Яғни, мемлекет ақшасына қажетсіз өнім сатып алынған.
-
Кейбір дәрілер арнайы сараптамадан өткізу сылтауымен әдейі кідіртілген.
-
Мысалы, «Кластеон» атты препарат 2,5 жыл бойы тіркеуді күткен, ал дәл сол уақытта оның қымбат аналогтары сатып алынған.
-
Ал кейбір дәрілер небәрі 25 күнде рұқсат алып отырған.
-
-
Кейбір дәрі-дәрмектер мүлде сертификатсыз, ешқандай сараптамасыз ауруханаларда қолданылып жатыр.
-
Аудиторлық палата мұндай 23 миллион данадан асатын препаратты тіркеген. Жалпы құны – 12 миллиард теңге.
-
Мемлекет үнемдей алар еді. Бірақ…
Арыз авторлары атап өткендей, мемлекет он миллиардтаған теңгені үнемдей алатын еді. Бірақ, кейбір тұлғаларға дәрі-дәрмекті қымбатқа сатып алу тиімді болып отырған секілді.
«Бұл жай ғана салақтық емес. Бұл – жүйелі, ұйымдасқан әрекет. Біз Бас прокуратурадан толық тергеу жүргізуді талап етеміз», – делінген депутаттардың мәлімдемесінде.
Редакцияға депутаттардың ресми арызы келіп түсті. Біз оқырманға оның мазмұнын алдағы материалдарда кеңінен таныстыратын боламыз.
