Қазақстанда құрылыс саласында жасанды интеллект пен дрондарды сынақтан өткізу басталды. Бұл туралы өнеркәсіп және құрылыс министрі Ерсайын Нағаспаев үкімет отырысында мәлімдеді, деп хабарлайды Todayinfo ақпарат агенттігі.
Министрдің айтуынша, жоспарлау және қала құрылысы сатысында компьютерлік көру мен жасанды интеллект қолданылатын пилоттық жоба іске қосылған. Жүйе нысандарды талдап, оларды бекітілген жобалық құжаттамамен салыстырады.
«Бұл сәйкессіздіктерді анықтау уақытын үш жұмыс күнінен төрт сағатқа дейін қысқартуға және заңсыз құрылыс қаупін азайтуға мүмкіндік береді», — деді Нағаспаев.
Сонымен қатар министр қалаларда дрондар ұшырылатынын айтты. «Қазақтелекоммен бірлесіп, қалалардың цифрлық егіздерін жасау үшін дрондарды пайдалану бойынша жұмыс жүргізілуде», — деп қосты ол.
