Инфляция төмендемейді: Дүниежүзілік банк 2025 жылға Қазақстан экономикасына болжам жасады

Дүниежүзілік банк 2025 жылға арналған Қазақстан экономикасының жай-күйіне қатысты есебін жариялады, деп хабарлайды Todayinfo. Онда Қазақстан экономикасы 2024 жылы 4,0%-ға өсті, ал 2025 жылы өсу қарқыны 4,5%-5,0% аралығында болады деп болжануда. Бұл өсім мұнай өндірудің артуы, экспорттың өсуі және фискалдық қолдаудың жалғасуы сияқты бірнеше факторлармен байланысты. Дүниежүзілік банк экономикалық өсу 2025 жылдан кейін баяулайды деп есептейді, себебі еңбек өнімділігінің төмендігі мен инвестициялардың азаюы экономиканы әртараптандыру қажеттілігін арттырады. Инфляция деңгейі туралы да маңызды ақпарат бар. Қазақстандағы инфляция төмендегенімен, ол әлі де жоспарланған деңгейден жоғары болып қала береді. 2025 жылға болжам бойынша инфляция 7,5%-8% деңгейінде сақталады, бұл мақсатты көрсеткіштен жоғары. Болжам бойынша инфляция 2026 жылға қарай 6%-ға дейін төмендеуі мүмкін. Есепте Қазақстанның фискалдық саясатының әлі де кеңейту бағытында екені және бұл бюджеттік тапшылықтың өсуіне әкелетіні атап көрсетілген. 2025 жылы бюджет тапшылығы ішкі жалпы өнімнің 3,1%-ына жетуі мүмкін. Сонымен қатар мұнайға әлемдік сұраныстың төмендеуі мен экстремалды ауа райы жағдайларының экономикалық өсуге теріс әсер етуі ықтимал. Дүниежүзілік банк есебінің арнайы бөлімінде табыс көздерін арттыру үшін салық жүйесін реформалау мәселесі қарастырылған. Ұсыныстар арасында табыс салығын прогрессивті жүйеге көшіру (табыстың мөлшеріне қарай өзгеретін салық ставкасы), тиімсіз салық жеңілдіктерін алып тастау , ҚҚС және экологиялық мақсаттарға баса назар аудара отырып, акциздерді реформалау. Бұл шаралар бюджет кірістерін арттыруға және елдің фискалдық тұрақтылығын жақсартуға көмектесу үшін ұсынылған.