Астананың өңірлік жалпы өнімі (ӨЖӨ) 2025 жылы 11,6%-ға өсіп, бұл Қазақстанның барлық өңірлері арасындағы ең үздік көрсеткіш болды. Мұндай деректерді Ұлттық статистика бюросы (ҰСБ) жариялады.
Үздік үштікке Шымкент (11%) және Түркістан облысы (9,3%) енді. Ал ең төменгі өсім Шығыс Қазақстан облысында тіркелді — 0,9%. Абай облысында (1,2%) және Батыс Қазақстан облысында (1,3%) жағдай сәл жақсырақ.
Сегіз өңірде өсу қарқыны жалпы республикалық деңгейден (6,5%) жоғары болса, 12 өңірде нәтиже төмен. ӨЖӨ өсімінің қарқыны ҰСБ-мен физикалық көлем индексі (ФКИ) әдісімен есептеледі, ол инфляцияны ескере отырып, ақшалай көрсеткіштегі өнім көлемінің өзгеруін көрсетеді.
Жан басына шаққандағы ӨЖӨ бойынша Атырау облысы көш бастап тұр, мұнда Қашаған және Теңіз мұнай кен орындары орналасқан. Номиналды ӨЖӨ мөлшері бойынша ол Алматы мен Астанадан кейін үшінші орында.
2025 жылдың қорытындысы бойынша Қазақстанның ЖІӨ 159,6 трлн теңгені құрады. 2024 жылмен салыстырғанда экономиканың өсу қарқыны 5%-дан 6,5%-ға дейін үдеді. Ағымдағы жылдың бірінші тоқсанында ЖІӨ жылдық көрсеткіште 3%-ға өсті, бұл өткен жылғы 5,6%-дан төмен.
Halyk Finance сарапшылары мұның негізгі себептері ретінде өндіруші саладағы баяулауды (өткен жылдың жоғары базасы аясында Теңіздің жаңа қуаттарын іске қосу), халықтың нақты табыстарының төмендеуін және экономиканы фискалдық ынталандырудың азаюын атайды. Halyk Finance болжамы бойынша, 2026 жылы ЖІӨ 4,8%-ға өседі.
