Елордалық мектепте «Болашақ прокурорлар» клубы ашылды

Елордалық мектепте «Заң мен Тәртіп» айлығының қорытындысы шығарылды. Іс-шаралардың қорытынды кезеңінде Машһүр Жүсіп атындағы №57 орта мектепте Өтеген Сейітов атындағы «Болашақ прокурорлар» клубының салтанатты ашылу рәсімі өтті, деп хабарлайды елорда әкімдігінің ресми сайты. Клуб қатарына құқықты және құқық қолдану қызметін зерделеуге белсенді қызығушылық танытқан 10 оқушы қабылданды. Клуб жұмысының негізгі мақсаты – оқушылардың құқықтық сауаттылығын арттыру, азаматтық жауапкершілігін дамыту және білім алушылардың кәсіби бағдарын айқындау. Іс-шараның құрметті қонағы ретінде Астана қаласы прокуратурасының мемлекеттік айыптауды қолдау және апелляциялық сатыға қатысу басқармасының басшысы Айжан Аймағанова, Сарайшық ауданы прокуратурасының аға прокуроры Құралай Ізмұратова, сондай-ақ Қоғамдық мүдделерді қорғау бөлімінің прокуроры Нұрдәулет Ешенқұлов қатысты. Кездесу барысында прокуратура органдарының өкілдері өскелең ұрпақтың құқықтық тәрбиесі, заң талаптарын сақтау қажеттілігі және болашақ мамандықты саналы түрде таңдау мәселелеріне арналған мазмұнды баяндамалар жасады.